تذكير بمساهمة فاتح الموضوع :

اخواني أعضاء منتدي شباب برمبال القديمة والرياض
هنا سنقوم بعمل قاموس للالفاظ القديمة الدارجه مع التعريف بمعناها الحقيقي في اللغة العربيه وذلك لأن هناك الكثير من هذه الكلمات لم يعد يستخدمه احد الآن وحفاظا علي هذه الكلمات من الاندثار سنقوم بتجميعها هنا لأنها أيضا جزء من تاريخنا ومن هنا أود أن أتوجه بالشكر للأستاذ علي حسن داوود صاحب الفكره الاصليه منذ أكثر من خمسة عشر عاما والتي لم تري النور الا الآن لذلك نتمني أن يكون معنا في هذا العمل وتكونوا كلكم معنا ليخرج هذا القاموس الي النور باذن الله وياحبذا لو أدخلنا اللفظ في جملة حتي يكون سهل للجميع فهمه ساضرب مثالا
انهارده عندنا تصبين
بمعني أن اليوم سنقوم بغسيل الملابس

حامد علي خلف جنيدي

 

تُشْكَر يا سي محمد يا أبوالسعيد يا زوء يا ابن الأصول علي الزياره دي ولو ان كان نفسنا تِطَوِل معانا شويه أصل أعدتك حلوه ميشبعش منها وبعدين ايه اللي خلي الواد الغشيم ده الهي يجيله ضربه في بنيؤه يخلي الحمار يدلي الأرض هو حِمل الكلام دِه كان خلاه واقف علي السكه وطلع الحاجه حملها بره من علي السكه لكن مفيش فايده في الغشوميه دهي اللي مبتسيبوش أبدا كَتُه أصفه تئصفه وبعدين ياسي محمد ازاي تسرح الغيط من غير المسحه هو انت رايح لمؤاخذه تتفسح وياسيدي بدل ما كَت تروح تجيب المسحه كَت شوف رمروم أش من علي أي عريشه واحشره تحت عجل العربيه وهي تطلع بس تسدء كده أحسن هشان السطوحي ده يتعلم ومعتش يفتري علي الحمار الغلبان

 

مهو السطوحى ده ياسيدى اللى عملها فيا اتحاش فى جتته
خدت الشؤرف وسرحت عشان نحش ربه وهو نزل العربيه فى الارض وهى لسه مرويه ودهوس فيها ارمى الربه المحشوشه اتحاش فى تنته وبهدل الارض
وبعدين طلع ما بيعرفش يحش وبيفوت البرايب وراه وطلع واد سَكْهِ
ودايما لما بيحمل العربيه بيخلى العريش خفيف وعاملى فيها طيار ويمسك السُرع ويقول تكتكتكتكتكتكتكتكتك
الكلمة بتاعة اسماعيل يس دى
انا عايز اشوف نفر تانى يبقى يحش معايا لان الواد ده غشيم وبيفشر عليا ويقول مقدم على تليفون للحمار بتاعهم
بلا وكسه
جته كاس على خيبته

 

الا أؤلي يا سي محمد يا أبوالسعيد متعرفش البوابه هتساب امتي أصل الأرض حدانا بأت شرائي والشتا اتأخر السنه دي واحنا خايفين علي شوية الغله لعاود يبوظوا ومايصحوش معانا

 

اوعى يا ابو خلف تقل عقلك وترويها الاخبار بتؤول انهارده ان بكره حيبقى شتا عوم والميه حتبقى للركب وبعدين البوابه مش حتتساب اليومين دول عشان عمك الحاج عباس البحار بعافيه شويه
وبعدين بقولك ايه مافيش على ايدك واحد ياخد البقره اللابطه بتاعتنا بالتقويم ونريح نفسنا بقى من حش الربه والواد السطوحى السكللى ده ده بيتسكلن علينا وخلاص ولما تكلمه يفتح جعيرته على الفاضى جته عقربه تلوشه
لا ومن نصاحته كان عايز يزرع الغله على مساطب ويعمل الرز زريعه هو الرز برده بيتعمل زريعه
انا بحاول اتفلفص منه ومش عارف ماعندكش ياحيلى حل يخلصنى من غشوميته دى

 

جميل جدا الا بيحصل ده
متتخيلوش انا مبسوطه ازاي بالحوارات دي
بصراحه في منتهي الجمال
مع ان في كلام أول مره اسمعه
بس بجد ممتاز يا أ/حامد وانت باقي الاخوه


ويبقي الامل موجود

 

 

عليك وعلى ابوك منصور ابو عدوى دوغرى هو هيتصرف لك فى نفر جدع وعايز ياكل عيش احسن من الكسلاتى ده اصل ده اتبطر على النعمه اللى هو فيها (هو يعنى كان لاقى اللضا )هما دايما كده زى الاطط تاكل وتنسى اما بقى ابوك منصور هيتصرفلك فى نفر يكون شغيـــــــــل بس المهم لما يجيلك نفر البه على المصلحه متكسلش انته وترمى الحمل عليه لازم تعاونه دى الأفه ام ودنين بيشيلوها اتنين

 

يعني ياسي محمد يا أبوالسعيد الواد السطوحي شغال معاك بايده وسنانه بآلُه كام سنه ودلوئتي معدتش لادِد عليك وعايز تجيب نفر بَدالُه وانت يا أبوأحمد يعني بدل متؤله يصبر علي الواد شويه رايح تشيعه للحاج منصور طيب الواد الغلبان دِه ياكِل هو وعياله منين ما انتوا عارفين انه واد غشيم ومحدش هيتحمله يبأه نيجي علي نفسنا شويه ونسيبه يشتغل وممكن ربنا يكرمه ويفهم وبعدين كِل حاجه في ايدنا احنا منخليهوش يعمل حاجه من نفسه احنا اللي نؤله يعمل ايه ومتنسوش ان احنا أهليه في بعض ومينفعش ناكِل في بعضنا وبعدين ياسي محمد الدنيا مشتش ولا حاجه ولا شوفنا الميه للركب انت كَت بتتفرج علي التلفزيون في الحلم ولا ايه ولا انت عاملها بالعنيه هشان استني وانت تنضح شويه الميه اللي في المسأي أبل ما أخدهم

 

انا مش عارف دلوقتى ارضى مين فيكم انتم الجوز
فؤلت اخد بكلام الكبير بس لئيتها فكره ظالمه
فايه رايكم نشوف حد معاه طاظ ونجرب وواحد يختار الملك والتانى يختار الوزر واللى يطلع الطاظ صح حمشى جداه
ويبقى الواد السطوحى يقعد او يغور ونرتاح ون سكلنته
يللا واحد يجيب الطاظ والتانى يختار

 

يعني انت يا ابو حمزة 2 اللي عامل فيها نِطِل اوي ؟ طب افرض ان واحد منهم حَرْنَأ هنعمل ايه يا فلحوس ؟

 

وهو احنا فينا من الحرناه كمان
طيب كل واحد يروح يلعب عند بيته ولو الكوره دى جت هنا حشؤها
واللى حيعمل فيها حريف يتدلالى فى لعب الجواعير
انا عندى جعور جزره وبعرف افره عزامى واللى مستغنى عن جعوره يقابلنى فى الجنينه عند التيرو
وانا حتحدت مع الفرقه بتاعتى ونضارب بعض هناك
واشوف انا نطل وللا لا

 

ماشى يا دلعدى انت وهو

 

دلعدى يا ابو حمزة تلعب (((( جاعور)))) !!!! سن ولا مسمار

 

الا صحيح يا رجالة هو احسن العزّامي و لا السّلّاتي في فر الجاعور ؟ و انا حسيت ان ابو حمزة كان دايما بيقع علشان كِسْوِتُه كانت دايما سَالْته.

 

انا برده يا شرقاوى اللى كسوتى بتتسلت
دا انا كنت بفر الجعور البلستك بالكسوه
وماسبتش حاجه الا لما عملتها جعور من الجزر للبصل
وبعدين انا فضلت مستنى فى الجنينه ومحدش صوبها ولا حد هوب هناك
وبعدين السلاتى ده بتاع اللى لسه بادئ يلعب جواعير

 

جري ايه ياجدعان هو احنا هنعملها ملعبة صُغار هنا ولا ايه أكن احنا هنسيب السطوحي اللي هيتأطع عيشه ونْدُور نلعب جواعير والله ما حد عملها ألا انت يا محمد يا أبوالسعيد وكِل دِه هشان تنسينا موضوع السطوحي وتُخْلٌص منه بس مين انت مفكرني كُرُديه وهتعدي علي لا انسي يا آبه السطوحي كوم والغيط كِله كوم انا عندي استعداد مخليش حد يُصرُبها بس أرجع وأأول برضه احنا أهليه وملهاش لازمه المشاكل بس هاأأولهالك تاني الا السطوحي الغشيم لأنك لو سيبته مش هيلائي في وشه غيري

 

كان فيه جدع من البر التانى نافد من شارعنا وجاى يسأل على ابو المعاطى -حكم هما اسايم -وفضل يحكى على السطوحى وجرايره -بس ربنا يهدى النفوس والميه ترجع لمجاريها-اصل من طلع من داره اتقل مقداره

 

يا جماعه يعنى انا لسه بتفلفص من السطوحى الغشيم تجيبولى ابو المعاطى هو انا ناقص
لا واسايم كمان يعنى اطلع من نؤره اتحط فى دحديره
لا وابو خلف بيعصى الناس عليا عشان خاطر السطوحى ما يشتغلش عنده
طيب حتشوفو انا حعمل ايه
وانت يا ابو خلف انا حشيعلك جواب على الخاص ابقى افتحه بالراحه عشان الظرف ما يبوظش يابنى

 

ايه يارجالة البلد مستنى حد يحل موضوع السطوحى الغشيم كله طنش
يعنى خلاص ابلبط لواحدى
طيب شوف بقى يا ابو خلف انا حشيعلك السطوحى واقوله انك عايزه فى شغلانه معاك وابقى اخلص انت منه بقى وورينى انت حتتفلفص ازاى

 

الله على الموضوع تسلم ايدك يابو حمزة
انت والصحبه الحلوة دى
فكرتونا بايام زمان
الايام اللى كلها بركه بناسها البسيطه
بس احنا فى النشفيه والمايا قاطعه ومفيش حدانا ولاندعه مايا
ماحداكوش شويه مايا للشرب

 

بُص
يا محمد يا أبوالسعيد اذا كَت مفكر انك هتستنصح علي وتشيعلي السطوحي علي سْفِير
انك تبليني بيه بأولهالك أهو انسي يا آبه وابأه أأبلني حدا سكة صعب ومهوش أني اللي
يدِحِك عليه علشان أني منيش بُهُوتي وهتسكردني وأني بأولهالك أهو كمان مره
متشيعوش


وبأأول
للأخت العنقاء احنا كَنا ماليين صنوارين مَيه من طرمبة العناتره اللي علي المشروع
اللي عِدال الجامع وميجراش حاجه لو ادَناكُم صنوار ماهي الناس لبعضيها برضه علشان
حتي النفر لما يصحي من النوم يلائي بعدِش مَيه يطُس بيها وشه أبل ما يِتْفاوِل

 

يا جماعه الخير لو السطوحى ده مزهأكم شيعوهولى وانى هخليه يأول حأى برأبتى حقوم عامله حته معجنه بس ايه على كيفك وحخليه يترط فيها من النجمه ولو عاز ميه يجيب من الترعه بالصفيحه ولو اتبه للشغل وبقى البه ع المصلحه حزوده يا عم بريزه فى اليوميه خليه يشبرأ على نفسه --- بس انى ليه طلب يا ابو حمزه هشيعلك رساله اباى عبى لى شويه ميه فى الحله المأبيه واهوجبر الخواطر على الله

 

بقولك ايه يا عم الحداد انا حشيعهولك وانت اتصرف معاه بس اوعى الاقيك مشيعهولى تانى
وبعدين انت حتقضيها شحاته وحتشحت بصفيحه
خدلك جركنين ورح على الطرمبه ولقط رزقك
وبعدين يا نطل ما عملتش حسابك ليه قبل النشفيه يا فالح
بلا وكسه

 

انى كت عامل حسابى ومعبى فنطازين بس واحد فيهم طلع بيخر -اعمل ايه بأى اموت من العطش لو منتاش عايز تجيب أولى -انت هتزلنى

 

ياعم ولا زل ولا حاجه
شيعلى بس الواد اللى فى الصوره بتاعتك دى وانا اديله اللى فيه القسمه
الا قوللى يا دلعدى هو المحروس اللى فى الصوره ده اسمه ايه عشان لما ييجى ابقى اعرف اسمه ايه
وبعدين انت لو جايب الفناطيز بتاعتك دى من عند الاستاذ شاكر ما كانش طلع فيهم حاجه مخرومه