اخوتى متابعى يوميات السطوحى الغشيم ومراته محاسن اولا اعتذر عن تاخر الحلقه الحادية عشر وذلك نظرا لظروف عمل خارجه عن ارادتى
والان موعدكم مع الحلقه الحادية عشر

11

بعد ما راح عبده لنينته وعمكم السطوحى اتطمن على الحاجه منيره وكان خلاص المغرب قرب ياذن وكان لازم يروح عشان البهايم بتاعته واكد على عبده انه لو حصل حاجه لنينته يروح للحاج دسوقى ابو ابراهيم وعرفه وهو يتصل بيه على المحمول

روح عمكم السطوحى لمحاسن وكانت مجهزاله المواعين اللى حيحلب فيها المهم حلب البهايم ونضف الزريبه وعلفهم وطلع بقى عشان يتعشى وينام

قام عمكم السطوحى الصبح وصحى محاسن وقالها
جهزتى الاكل يا محاسن
ايوه كل حاجه جاهزه
طيب ما تنسيش عشان خاطرى يا محاسن تروحى تتطمنى على امى ضرورى وتشوفى لو محتاجه حاجه
طيب خلاص والله حروحلها وحشوف طلباتها
طيب يللا بقى انا حمشى عايزه حاجه
لا سلامتك مع السلامه
سلام عليكم
وعليكم السلام

سرح عمكم السطوحى شاف مصالحه فى الغيط وجاب اكل البهايم ورجع
هيه يا محاسن روحتى لامى
ايوه والحمد لله عادت كويسه وقامت من السرير وفضلت قاعده معايه شويه حلوين وجيت بقى عشان الحق اجهز الغدا قبل ما تيجى
طيب الحمد لله والعصر ابقى اروحلها بقى
بس انا عايزاك لما تشوف الواد عبده تلطشله
ليه عمل ايه
بداها دلع من اولها وما راحش المدرسه انهارده
اهو ده اللى انا كنت عامل حسابه عارف ان امى حتدلع الواد ده وهو ما حيصدق يقعد عندها
انا والله كنت بفكر ان فاطمه هى اللى تروح تبات عند نينتها
ما ينفعش يا محاسن الواد حتى لو اتاخر لبالليل عليه يروح لنينته لكن البنت لا وبعدين عبده عليه يتصرف لو نينته تعبت بالليل لكن فاطمه حتعمل ايه
عندك حق يا سطوحى بس حنعمل ايه يعنى
سيبيه بس وانا لما اروحله اشوف شغلى معاه
طيب هو انت سرحت لواحدك انهارده
ايوه ليه
اصل الحاج سيد ابو احمد عدى عليك وبيقولك لما تيجى ابقى روحله عشان عايزك فى حاجه مهمه
خير ما قالكش عايزنى ليه
لا ما قالش قالى بس قوليله اننى عايزه
طيب خلاص اتغدى واروحله ,هما العيال لسه ماجوش من المرسه
زمانهم جايين عما تكون استحميت يكونو وصلم

اتغدى عمكم السطوحى وراح على عمكم السيد ابو احمد
يا حاج سيد
ايوه ياسطوحى تعالى ادخل
سلام عليكم
وعليكم السلام ازيك يا سطوحى
خير يا عم فى ايه
خير بس الموضوع عايز قعده تعالى ادخل
ايوه ياعم قول بقى قلقتنى
شوف ياسيدى انا قابلت على ابو عيد ابن خالتى فاكره
ايوه ياعم مش ده اللى باع ارضه وراح اشترى ارض فى الاسماعيليه
ايوه هو
ده ياسيدى كان معاه فدان ونص وباعهم واشترى بحقهم 4 فدادين هناك وبنى بيت وماشى حاله هناك
طيب وانا مالى ومال الكلام ده
ما اهو انا جايلك فى الكلام اهو يا عم طول بالك
كمل يا عم
الراجل بيعرض عليا انى ابيع ارضى واروح اشترى 10 فدادين هناك فى الاسماعيليه
بس حق الارض حيبقى اكتر من حق ارضى وصاحب الارض مش عايز يقسمها وعايز يبيعها مره واحده
فانا بفكر نشتريها سوا
ازاى يعنى
تبيع ارضك وانا ابيع ارضى ونشترى الارض دى سوا الواد على بيشكرلى فيها قوى
لا ماينفعش ابيع ارضى يا حاج سيد
يابنى الفدان حيجيب فدانين
ولو حيجيب 10 برده مش موافق
ليه يا اخى طيب نروح نشوفها الاول عجبك الحال خير ما عجبناش خلاص نصرف نظر
الحكايه مش حكاية الارض يا حاج سيد
امال ايه بس
امى ياسيدى
مالها ما تاخدها معاك هناك واهو حنكون كلنا سوا
يا اخى انت مش فاهم حاجه
طيب ما تفهمنى انت يا عم
ياسيدى امى ما رضيتش تسيب بيت ابويا وتيجى تعيش معايا حترضى تسيب البلد وتيجى معايا بلد تانيه عند ناس لا تعرفها ولا تعرفهم
ما تحاول يا سطوحى مايمكن توافق وحتى عليك تبيع بيت ابوك واهو بحقه تزود نصيبك فى الارض كمان
ده من رابع المستحيلات يا حاج سيد انت يعنى مش عارف امى
عارفها يا سطوحى بس ما تشوف يا اخى وعشان تتاكد شوف يوم يناسبك ونروح نشوف الارض
يا حاج سيد قلتلك المشكله مش فى الارض انا ماينفعش اروح من غير امى وانا متاكد ان امى مش حتوافق
خساره والله ياسطوحى على اوصاف الواد على ده الارض دى لقطه
ربنا يعوض علينا يا عم حعمل ايه امى مالهاش غيرى فى الدنيا وكمان تعبانه اليومين دول يعنى ما فيش امل
طيب خلاص بقى اقوله يصرف نظر وخلاص وربنا يكرمنا باحسن منها

خلص كلامهم مع بعض واستاذن السطوحى ورجع بيته واخد محاسن والعيال وراح على بيت امه يتطمن عليها

السلام عليكم يا اما
وعليكم السلام ورحمة الله وبركاته ازيك يا حبيبى
عامله ايه دلوقتى يا اما
انا الحمد لله عدت كويسه يا ضنايا ربنا مايحرمنى من طلتك ابدا
ربنا مايحرمنى من دعواتك ابدا يا اما بس انا زعلان منك
ليه يا حبيبى خير
كده يا اما من اول يوم تسيبى الواد عبده مايروحش المدرسه
والله يا بنى انا اللى صحيت متاخر ومالحقش يروح المدرسه هو ما ذنبوش حاجه
والله انا جاى وناوى اطلع روحه فى ايدى بن ..........ده
لا والنبى عشان خاطرى يا ضنايا ماتزعله ودى اخر مره
بس كده حيتعود عليها يا ما
لا خلاص هى دى اخر مره عشان خاطرى انا
طيب خلاص يا اما بس انا والله نفسى الواد ده يطلع حاجه كويسه ما يبقاش زيى
الواد شاطر فى المدرسه ياسطوحى وان شاء الله حيبقى دكتور
يارب يا اما حتى ما يعملش زيى
الا قولى ياسطوحى انت كنت عايز تطلع ايه وانت صغير
اناهههههههه انا كنت عايز اطلع غفير بس ما جبتش مجموع ههههههههههههههههههه
ههههههههههههههه الله يحظك ياسطوحى طول عمرك غاوى ترياه حتى على نفسك
ايوه كده اضحكى ياشيخه وحشتنى ضحكتك
ربنا يسعدك يا سطوحى يابنى يارب


وكده عدى اليوم وروح السطوحى واكد على امه انها ما تدلعش الواد عبده وانه لازم يروح المدرسه

وبكره بقى ان شاء الله نكمل باقى يوميات السطوحى الغشيم ومراته محاسن ان شاء الله

 

 

كل يوم حلقه جديده ومميزة
اليوميات دى جذبتنى ليها
ولازم اتابعها يوميا
بالتوفيق يابوحمزة ربنا يعينك
جزاك الله خيرا

 

اقترح عليك ياباشا
انك تبعد المسافه بين كل حلقه وحلقه
عشان يبقي فيه جو من الاثاره
و عشان كل حلقه تاخد حقها والجمهور يشوفها
بس ولك مني جزيل الشكر

 

SAAD.BASHA كتب:

هههههههههههههههههههههههههههههه

حبيب قلبى أبو حمزة ربنا يوفقك وتكملنا الحلقات كلها

انا عاوز اشتغل غفير ياعم ملياش دعوة ..... ههههههههههههههههه

بجد مجهود رائع منك والله ياابو حمزة تسلم

ياعم هى شغلانه
هاتلك بندقيه من ام 2جنيه ونص دى والبس جلابيه فلاحى بكم واسع وربى شنبك بس ربيه بافترى يعنى
وبس
كده بقيت شيخ الغفر كمان
ههههههههههههههههههههههههههههههههه
شكرا على مرورك حبيب قلبى

 

العنقاء كتب:

كل يوم حلقه جديده ومميزة
اليوميات دى جذبتنى ليها
ولازم اتابعها يوميا
بالتوفيق يابوحمزة ربنا يعينك
جزاك الله خيرا

شكرا على مرورك
ويسعدنى ويشرفنى انها تنال اعجابك

 

مصطفي سمارت كتب:

اقترح عليك ياباشا
انك تبعد المسافه بين كل حلقه وحلقه
عشان يبقي فيه جو من الاثاره
و عشان كل حلقه تاخد حقها والجمهور يشوفها
بس ولك مني جزيل الشكر

المشكله ياعم مصطفى ان فى اعضاء محتاجاها كل يوم وانت ما تعرفش انا دماغى بيورم عشان الاقى الفكره اللى تعجب الاعضاء
بس انا حعمل باقتراحك فى الحلقه الجايه ان شاء الله واشوف رد فعل الاعضاء ان مشى الحال مع الاعضاء يكون ده النظام دايما مثلا حلقه كل 3 ايام وهكذا
ولكن ان وجدت طلبات بان تكون يوميه او شبه يوميه فليكن
فالقرار بيد الاعضاء المتابعين لليوميات
واشكرا اخى مصطفى على اهتمامك
اخوك ابو حمزه 2

 

والله ممتازومبدع فى اللهجه البرمباليه الله يعينك ويقدرك وتكتب كل يوم حلقه
ومشكووووووووووور على ابداعك

 

redaaswelam كتب:

والله ممتازومبدع فى اللهجه البرمباليه الله يعينك ويقدرك وتكتب كل يوم حلقه
ومشكووووووووووور على ابداعك

ربنا يخليك يا باشا وانا سعيد بمتابعتك لليوميات
ودعواتك يا عم ربنا يخليلك احمد ويكفيك شر المرض وحسنه قليله تمنع بلاوى كتيره يا كريم يارب

هى مالها قلبت جو شحاته كده
يللا مايضرش

 

الله عليك ياابو حمزه حبيبى تحت امرك فى كل ال تعوزه بس ملكش بركه الا محاسن وانصره مره
تحياتى لك والى الصديق الاخ ابراهيم كتير سلملى عليه