في البداية أود أن أشكر الجميع واحب ان اوضح أن وجودي في وسط هذه الباقة المميزة أمر اضاف لي الكثير جدا جدا
واود ان أشكر الاخ الفاضل الاستاذ حامد خلف ( أبوحمزة ) وأقول له انت تأمر ومن الصعب ان استطيع ان أرد دعوتك المهذبة جدا وأشكر الاخ العزيز أبوتسنيم على اعادة فتحه لهذه السلسلة الظريفة اللذيذة ومشكور على الدعوة
الشكر متصل للأستاذة العزيزة فاطمة على ترحيبها والتي وجودها في أي موضوع ينوره ويزيده الكثير والكثير
والشكر متصل أيضا للقائمين على هذا المنتدى لاني إستفدت منه الكثير جدا وإستفدت منه امرا هام جدا كان ينقصني وهو انني تعرفت على معظم الاعضاء وعرفت قدر كل عضو من خلال المنتدى وتعرفت على ثقافة العديد من الاعضاء وطريقة حوارهم وأسلوبهم في الحديث وكيفية تناولهم للامور وهذا كله لم أكن أعرفه إلاهنا

 

بالنسبة لموضوع يوم في حياتي سأبدأ أولا بتعريف طبيعة العمل لأن معظم أيام الغربة تقتصر دائما على العمل فقط

طبعا انا مسافر خارج مصر وبالتحديد في مدينة الرياض ( السعودية )
أعمل في شركة لتصنيع وبيع خزانات المياة ( خزانات بولي ايثيلين وليست الصاج )
الخزانا التي توضع على أسطح المباني ممكن تسموها بلاستك
منذ قدومي السعودية وأنا أعمل في المبيعات لأني بإختصار أعشق المبيعات ولاأحب العمل المكتبي سواء إداري أو محاسبي
وطبعا الشركة بتحملنا مسئولية كاملة عن كافة شيئ السيارة والمبيعات والتحصيل
دي كانت نبذة بسيطة عن طبيعة عملي وان شاء الله نكمل بالليل باقي الموضوع اذا كان في العمر بقية

 

 

مرحبا بالاخ العزيز الغالى (هانى البسطويسى)
وكم يسعدنى استضافته فى البرنامج المميز
فشخصيه مميزه لبرنامج مميز فعلا

والان ياتى سؤالى او طلبى للاخ هانى
طبعا انا اعرف انك الصديق الاقرب لابن عمى (هانى الجمل) واعرف مدى الصلة الوثيقه بينكما
فاريد منك ان تذكر موقف لا تنساه قد جمعكما سويا
ولى عوده معك ان شاء الله

 

 

السلام عليكم جميعا ورحمة الله وبركاته
عدنا من جديد
بالنسبة لليوم بيكون عامل ازاي
اليوم عندي له ثلاثة اشكال ممكن اليوم بالكامل من بعد الفجر الى بعد العشاء في سفر لان معظم شغلي بيكون خارج الرياض في أماكن متفرقة في المملكة ( يوم زي ده لايوجد به خلاف ركوب السيارة لاصل المكان المطلوب مني فيه شغل والصلاة والاكل والتواصل عبر الانترنت) واستغرق في هذا المكان يومين اوثلاثة او اربعة أيام على حسب الشغل ثم أعود نفس المسافة لأصل الرياض ( طبعا انا قمت بزيارة معظم مدن المملكة من أقصى لأقصى )
شكل ثان ممكن ان اسافر لمكان قريب واعود في نفس اليوم
شكل ثالث لايكون لدي سفر وأكون متواجد في الشركة لعمل بعض الاشغال ويكون ذلك عبارة عن دوام من 8 الى 12 ومن 4 مساءا الى 9 مساءا
يعني معظم شغلي بيكون خارج الرياض أقطع الكثير من المسافات لأصل الاماكن الذي تريد الشركة فتح شغل فيها أومتابعته وبعد ذلك أعود من جديد إلى الرياض لانهاء شغل الاسبوع الماضي والتجهيز للاسبوع الجديد
يعني الشغل منقسم مابين خارج وداخل الرياض
أجمل حاجة في شغل المبيعات انه فيه حرية أكبر وليس به تقيد بمكان اوزمان أهم شيئ الانتاج
ده يومي كما أعيشه هنا في السعودية مابين المبيعات والسفر وكلاهما أحبه

 

 

فاطمة كتب:

بارك الله فى عمرك وأسعد أيامك أخى
الفاضل المحترم الوقور،بالطبع كلنا شوق لاستكمال
الحديث عن يومك كيف يكون،بانتظارك للاستكمال
ومن بعده طلب(من خلال أرقام وعناوين)وضح لنا
أيامك الهامة،مع سرد لأحداث أهم يوم فيهم تأثرت به
[ندعوك للتسجيل في المنتدى أو التعريف بنفسك لمعاينة هذه الصورة]

الأستاذة العزيزة فاطمة أشكر لك مشاركتي وطيب نفسك وحسن كلامك وربنا ييسر لك جميع امورك
طلبك على العين والرأس
بالنسبة للتواريخ الأهم في حياتي
7 / 5 / 1977 = تاريخ ميلادي
29 / 11 / 2002 = وفاة الوالد عليه رحمة الله وهو من أصعب الأيام في حياتي و بداية تحمل المسئولية بشكل أكبر
19 / 6 / 2003 = سفري السعودية وبداية مختلفة
8 / 8 / 2006 = تاريخ زواجي والانتقال من حياة إلى أخرى
20 / 6 / 2007 = تاريخ ميلاد محمد ابني
10 / 6 / 2009 = تاريخ ميلاد ابنتي حبية
أعتقد أنها هذه أهم التواريخ في حياتي
أشكرك مرة أخرى أستاذة فاطمة على وجودك معنا

 

العزيز الفاضل / هانى البسطويسى

سعدت جدا بك وبهذه المعلومات و مع أنى اعلمها جيدا لأنى أعرفك جيدا وعشت معك بعض هذه الظروف فى السعوديه . الا ان ما قلته قليل جدا بالمقارنه بما تفعله فى عملك ومع الناس . فبالاضافه الى ذلك فانت رجل خدوم جدا وصادق جدا وحمول جدا وتفعل ما تقول بالذات فى الغربه وهذا لا يكاد يحدث بين المصريين . ولا حتى بين الاقرب .

جزاك الله خيرا وبارك فى عمرك

محمد داود

 

مرحبا بك ابو محمد ،، معلش اتأخرت عليك شويه سامحنى غصب عنى ،،
سعدنا باستضافتك هذى ونتمنى ان تنال هذه الاستضافة القبول لديك
بارك الله لك فى زوجتك وفى محمد وحبيبه ويارب عقبال ماتفرح بهم كده
ان شاء الله ،، اسأل الله ان يحفظك فى غربتك وان يعيدك سالما غانما
الى اهلك ووطنك .
استاذ هانى متقلقش مش هنتقل عليك واسألتنا هتكون فى حدود اليوم بس
وفى حدود ماذكرت ،، ذكرت انك تعمل فى شركة لتصنيع خزانات المياه

مالفرق بين الخزان الفايبر والبلاستيك والصاج وايهم افضل ؟

ماطبيعة العملاء الذين تتعامل معهم ،، بمعنى هل من الممكن ان تقوم بالبيع
قطاعى يعنى قطعه واحده ، ام انك تفضل سياسة البيع بالجمله فقط ؟

بجد ليك حق انك متحبش العمل المكتبى ،، انا برده زهقت منه ولكنى
اعشق مهنتى ،، بس قريب جدا افكر اغيرها ،، الواحد شويه وهيلسع هههههه .
المهم بقى لو كنت اول مانزلت السعوديه واتعرض عليك شغل مكتبى
كنت هترفضه اكيد طبعا لاء ولا ايييييييييييييه ؟

بجد زى ماذكرت ان اجمل حاجه فى شغل المبيعات ده هو عدم التقيد بدوام او غيره
بتكون حر شويه ،، وعلى قد ماهتشتغل ربنا هيكرمك وهتزيد عمولتك
انا بعتبره كالتجاره بالظبط وسيدنا عبد الرحمن بن عوف اول مانزل المدينه
قال للناس دلونى على السوق وهناك ومن خلال التجاره اصبح اغنى اغنياء القوم .

أسأل الله عز وجل ان يبارك فيك استاذ هانى ،، وان يرزقك من الرزق الوفير
وان يبارك لك فى اولادك ،، وان تعود سالما غانما الى وطنك .

 

ابوحمزه الجمل كتب:

مرحبا بالاخ العزيز الغالى (هانى البسطويسى)
وكم يسعدنى استضافته فى البرنامج المميز
فشخصيه مميزه لبرنامج مميز فعلا

والان ياتى سؤالى او طلبى للاخ هانى
طبعا انا اعرف انك الصديق الاقرب لابن عمى (هانى الجمل) واعرف مدى الصلة الوثيقه بينكما
فاريد منك ان تذكر موقف لا تنساه قد جمعكما سويا
ولى عوده معك ان شاء الله

أشكرك أبوحمزة على مشاركتك شرفتنا ونورتنا
بالنسبة لطلبك الغالي انت لما ذكرت هاني الجمل انا ضحكت جدا وكل ما اشوف السؤال اضحك من قلبي ليه بقى
لانه بإختصار شديد
هاني البسطويسي + هاني الجمل / ( أي شغل أو مصلحة ) = الفشل بعينه
كل ماندخل شغل مع بعض النتائج بتكون واضحة مسبقا فاتفقنا نكون اصحاب بس
ياراجل هو فيه حد الشريعي نصب عليه الااحنا
وطبعا معظم ايام الفشل كانت مع الجمل فأكيد فيه ذكريات كتيرة منيلة بنيلة بس والله من أجمل أيام حياتي هقولك منها موقف بسيط
كنا في العريش رايحين نبيع سبلة فراخ واحنا بنزل السبلة شوفنا حتة أرض متحوطة ومزروعة مانجا لونها أحمر والمانجا ساقطة من الشجر على الارض فقلنا نروح نشوف المانجا اللي ملهاش اصحاب دي . رحنا ويدوب مسكنا حبتين لقينا كلب صغير مربوط في الاخر فضل يهوهو وفجأة ياعم الحاج لقينا صاحب الارض جه منين ماتعرفش
وطبعا زي مابيقولوا الجري نصف الجدعنة انا طرت في الدنيا والراجل مسك الجمل وعينك ماتشوف الا النور وكان هيوديه الشرطة لكن ربك سترها اكل علقة يومها يابني
دا بس أحد المواقف اللذيذة مع صاحبي وأخويا وحبيبي وعلى فكرة انا معاشر هاني من زمان وابسط مااقوله في غيابه انه راجل جدا وامين جدا وربنا يعينه على حاله ويهدي له دماغه اللي احيانا بتسبب له مشاكل
مشكور ياغالي على المرور

 

الجيوكاندا كتب:

ربنا يعينك فى شغلك ويبارك لك فى رزقك وفى حياتك يااستاذ هانى ، لكن الشغل واضح ان هو شاق اوى يااستاذ هانى ، بس ربنا يجعل ايامك كلها مباركة وانت هتكون سعيد ان شاء الله

أشكرك الجيوكاندا عل المشاركة وعلى دعواتك وربنا يصلح لك جميع أمورك ويوفقك دنيا وأخرة
أما بالنسبة لصعوبة الشغل أكيد صعب بس الاكيد ان كل اللي مغترب خارج مصر أي كان عمله سوف تجدين نفس الصعوبة لأن صاحب العمل يطالبه بالكثير من الجهد والعمل يقابله بمقابل مادي أقل بكثير ممايستحق هذا العمل
عموما ربنا يعنا ويوفق الجميع ويعين كل حد على حاله
وأشكرك مرة تانية على وجودك

 

اقتباس :

ياراجل هو فيه حد الشريعي نصب عليه الااحنا
وعلى فكرة انا معاشر هاني من زمان وابسط مااقوله في غيابه
انه راجل جدا وامين جدا وربنا يعينه على حاله

هههههههههههههههههههههههه
تصدق انا كنت متخيل ان الشريعى نصب على هانى الجمل بس
اصل انا عاشرت هانى 25 يوم ،، كنا فى الاسماعليه ،، كنت انا وهانى
وصاحبكم الشريعى اللى هو يبقى جوز خالت ماماتى ،،
الشريعى قال لهانى تعالى نروح مشوار الاسماعليه ده هنقطع شجر هناك
وهتاخد كل فلووووسك ،، المهم بقى من حظى الحلو انى كنت بدور على اى
شغل فى الوقت ده ،، فسامح عباس الشريعى ربنا يصلح حاله قالى تعالى
اوديك مع الشريعى وقد كان ،، كنت اياميها فى اجازة تانيه ثانوى
وهانى كان مخلص جامعه بقاله فتره ،، هانى كان اكبر منى
ب 8 سنين تقريبا ،
المهم خلاصة القول ان كان احلى مافى ال 25 يوم دول هو اخى هانى الجمل
كنت اعرفه ولكن معرفه قليله بحكم اننا من حاره واحده ،، ولكن خلال هذه الفتره
تعرفت على هانى اتم المعرفه ووجدته اخ اكبر لى فكان ومازال بمثابة اخى ايمن .

صحيح نسيت اقولك الشريعى ضحك على هانى برده ومعطلووش فلوووسه

 

 

ابو داود كتب:

ان ما قلته قليل جدا بالمقارنه بما تفعله فى عملك ومع الناس . فبالاضافه الى ذلك فانت رجل خدوم جدا وصادق جدا وحمول جدا وتفعل ما تقول

مرحبا بك استاذ /هاني في هذا اللقاء الجميل
وكم سعدنا جميعا به
وبالرغم من كل ما ذكرته عن يومك ومشقة عملك الا اننا نطمع في معرفة المزيد عنك وعن طموحك في الحياة
وربنا يوفقك ويكرمك وتعود قريبا لارض الوطن سالما

 

ههههههههههههههههههههههه
الجرى نص الجدعنه هه
على فكره هو كان حكالى الموقف ده بس من غير موضوع العلقه ده
اكيد عشان يحافظ على واجهة العيلة فى بلاد سينا
هههههههههههههه
والله ياعم هو انسان طيب وابن حلال بس الدنيا بتعانده ساعات
ربنا يكرمه ويكرمك يا عم هانى
وفى انتظار بقية الفضفضه يا عم ما تنفضش للناس
الناس مش حتسيبك الا لما تجيب اخرك
تقبل تحياتى واحترامى اخ هانى

 

ابو داود كتب:

العزيز الفاضل / هانى البسطويسى

سعدت جدا بك وبهذه المعلومات و مع أنى اعلمها جيدا لأنى أعرفك جيدا وعشت معك بعض هذه الظروف فى السعوديه . الا ان ما قلته قليل جدا بالمقارنه بما تفعله فى عملك ومع الناس . فبالاضافه الى ذلك فانت رجل خدوم جدا وصادق جدا وحمول جدا وتفعل ما تقول بالذات فى الغربه وهذا لا يكاد يحدث بين المصريين . ولا حتى بين الاقرب .
جزاك الله خيرا وبارك فى عمرك
محمد داود

الأخ والصديق العزيز محمد داود اتشرف دائما بمشاركتي واتشرف اكثر بمعرفتك
ومشكور على كلماتك ووجودك في الموضوع وربنا يوفقك ويكتب لك الخير
ان شاء الله نلتقي في مصر قريبا اذا كان في العمر بقية

 

ابراهيم نعينع كتب:

مرحبا بك ابو محمد ،، معلش اتأخرت عليك شويه سامحنى غصب عنى ،،
سعدنا باستضافتك هذى ونتمنى ان تنال هذه الاستضافة القبول لديك
أسأل الله عز وجل ان يبارك فيك استاذ هانى ،، وان يرزقك من الرزق الوفير
وان يبارك لك فى اولادك ،، وان تعود سالما غانما الى وطنك .

الاخ العزيز ابراهيم نعينع أشكرك على المشاركة وانا الذي أتمنى أن أكون ضيف خفيف عليكم .
وزي ماقلت قبل كده ان المنتدى أضاف لي الكثير بمعرفة الكثير من الاعضاء والاكيد أنك من الذين تشرفت بمعرفتهم ومنور الموضوع كعادتك في أي موضوع .
بالنسبة لأسئلتك
انت سألت ايه الفرق بين الخزان الصاج والفيبر :- الخزانات الفيبر اوالبولي ايثيلين قاموا بتصنيعها لتلائم ارتفاع درجة الحرارة في دول الخليج وكل فترة بيطوروا الخزانات حتى يحصلوا على أكبر قدر من ان يكون الخزان عازل للحرارة والضوء .
الخزانات الصاج تصلح في مصر لاعتدال درجة الحرارة الى حد كبير ولكنها لاتصلح في الخليج .
سألت هل أتعامل مع عملاء جملة ام قطاعي :- نحن في عملنا نتعامل مع الجميع جملة وقطاعي وأفراد وشركات ومحلات سباكة ومباسط وكافة العملاء .
بالنسبة هل لو كنت سافرت ولم أجد سوى عمل مكتبي :- اقول لك اولا انا اللي بحثت لنفسي عن الفيزة وعملت مقابلات في القاهرة وفي المنصورة لكي اجد فرصة في الخارج والحمد لله بتوفيق الله ودعوات أمي حصلت على الفيزة من أحد مكاتب القاهرة . في كافة المقابلات التي قمت بها كنت ببحث عن فيزة في المبيعات لأني بإختصار خلصت كلية تجارة ولم امارس أي عمل محاسبة بعد الكلية . وبعدين انا في المبيعات من سنة 91 في المواد الغذائية والمياه الغازية .
ولكن اذا كنت سافرت ولم أجد الا عمل مكتبي كنت سأقوم به حتى لو لم أطيقه لأن سفرية السعودية دي جت بعد العديد من الفشل كان اخره زيارة للكويت في 2002 لم يحالفني الحظ لتحويلها الى اقامة وما كنش ينفع اني افشل في دي كمان .
هذا ردي على أسئلتك ونورتنا وشرفتنا

 

ابو محمد الغالي حبيب قلبي ورفيق الدرب
لك مني وافر التحية والدعاء بدوام الصحة

بس يا غالي في حاجة مهمة مقلتهاش
كانت ضمن يوم من أيامك بس بعد الدوووام
وكانت جمس قديم مصدي ... ياريت تقول
لأعضاء المنتدي الكرتم عملت ايه في الجمس

تقبل اخي الكريم تحياتي

 

ابراهيم نعينع كتب:

اقتباس :

هههههههههههههههههههههههه
تصدق انا كنت متخيل ان الشريعى نصب على هانى الجمل بس
اصل انا عاشرت هانى 25 يوم ،، كنا فى الاسماعليه ،، كنت انا وهانى
وصاحبكم الشريعى اللى هو يبقى جوز خالت ماماتى ،،

صحيح نسيت اقولك الشريعى ضحك على هانى برده ومعطلووش فلوووسه

نيجي بقى ياسيدي للداهية الشريعي
ده رسخ عندي فكرة ان الجاهل ممكن ينصب على المتعلمين
الفلوس اللي انت بتتكلم عليها دي كانت شركة بيني وبين هاني الجمل والاخ الشريعي دخل معانا وعمل معلم وضحك على اصحاب المؤهلات العليا وكنا شراكة في جنينة شجر وفي الاخر نصب علينا وكان معانا وصلات امانة ضده وأخد حكم . وهج في الدنيا ومانعرفش ليه طريق جرة من وقتها وسلم لي على المتعلمين
اااااااه بقولك ايه ياهيما بما ان الشريعي جوز خالة مامتك ايه رأيك أما تسد عنه المبلغ اللي عليه هههههههههههه

 

اقتباس :

اااااااه بقولك ايه ياهيما بما ان الشريعي جوز خالة مامتك ايه رأيك أما تسد عنه المبلغ اللي عليه هههههههههههه

ولا اعرفه ،، ياعم ده نصب عليا انا كمان ،، بس النصبايه بتاعتى كانت صغيره
كان متفق معانا على 15 ج فى اليوم وفى الاخر حاسبنا على 10 ج بس
المهم منشار الخشب كان بتاع مين بالظبط ،، كان بتاعكم ولا بتاع الشريعى

 

 

بسم الله

الاخ العزيز هانى تقبل تحياتى ودعائى لك بالتوفيق دايما فى حياتك

من ناحية هانى الجمل فلما ربنا يكرم ونرجع البلد هنشوف الموضوع دة بتاع العلقة دى اصلوا عامل فيها انت المخ وانا العضلات وكدة ههههههههههه

بجد هانى الجمل راجل جداا مش علشان هو بن خالى لا وربنا دى شهادة حق وانت يا عم هانى شخصية محترمة وتجبر الكل على احترامك

على فكرة الشريعى فى بدايتة خالص كان بيشتغل جزار وكان فاتح محل فى بيتنا كان عمرى تقريبا عشر سنين او تسعة وكنت بقف معاه فى المحل على طول بس منصبش عليا هههههههههه

عارف لما ضحكت يا هانى ومحمد الجمل بيسألك على موقف مع هانى الجمل انا بردة ضحكت ولسة بضحك وانا بكتب المشاركة دى اصل انا ومحمد حاتم لو تعرفة كنا نفس الشيء كدة بالظبط لما نحط ايدينا فى اى حاجة الحمد لله لازم تخسر ههههههههه

تقبل تحياتى يا ابو محمد