استاذى الفاضل الجميل ابراهيم الامبابى

انه لمن دواعى سرورى ان يهدينى قلبى لاختيار حضرتك لانك فعلا

انسان جميل حياتك بها نقاط كثيره مضيئه التى سيستفيد منها جميع

اعضاء المنتدى وانا على ثقه من ذلك لانك قدوه ومثل فأهلا بك

وبعد اذن حضرتك هكون اول من يسألك

ارجو من حضرتك ان تعرفنا بنفسك عن قرب من خلال بطاقتك الشخصيه

ولنا طبعا عوده مره اخرى تقبل تحياتى

 

فينك يا عم ابراهيم

 

خالص الشكر للاستاذ نهاد سليم على اختياره الموفق
للاستاذ الفاضل ابراهيم امبابى فلكم يسعدنا تواجده بيننا
من خلال هذا البرنامج المتواضع لنتطرق من خلاله على
يوم فى حياة استاذنا الفاضل ،، كيف يقضيه ،، وبناءا على
فضفضة الاستاذ ابراهيم تاتى أسئلتنا والتى ستكون ايضا
فى حدود اليوم بمشيئة الله ،
لايسعنا استاذ ابراهيم الا ان نرحب بشخصك الكريم وفى
انتظار مداخلتك ، ولنا عوده ان شاء الله .

 

 

الاخوة الأفاضل هرد عليكم جميعا بس النت عندي ضعيف وتحت امركم
حد يحوش محمد داود عني 000 والجيوكاندا 000 لا تخربشيني ولا اخربشك
جزيل شكري لابو تسنيم على التقديم والترحيب في عملكم الرائع وخفيف الظل
وربنايجعلكم خفااف علي 000 على كل حال انا شرس بحذركم فرد فرد زنجة زنجة 000
دا الي الحكومة الشرعية قالت عليه زائدة دودية واقنعوني بالبراهين والأدلة العلمية
أن لساني في فمي ما هو إلا زائدة دودية بس رفضت أعمل العملية 000
شكرا مرة ثانية للأخ الفاضل ابو تسنيم والاخ نهاد سليم ونبدا الردود بسم الله
اني خايف 000 حد يساعدني 000 سؤال ممكن انسجب

 

 

بصم هقولكم على حاجة يمكن على قد فهمي انا هكتبلكم كل حاجي عندي في سطور وانتم استفسروا عن الي يعجبكم وحدة بواحدة 000
اني مش هخبي عليكم حاجة غير شوية ذنوب صغيرين كدا ربنا غفرهم خلاص وشوية ذنوب لسه بعملهم ربنا هيغفرهم اصل انا بستغفر 000
ما عدا كدا كل حاجة عندكم وبلا حدود 000
42 سنة مش بحب اتكلم عن نفسي ومتحفظ قوي 00 بس النهارده هفتحلكم الفيس بوك بتاعي على المكشوف وزي ما اتفقنا انا مش أنا ابراهيم امبابي دا واحد معرفوش هفتنلكم عليه لما تشبعوا جميعا

مع شكري لتحملكم لكثرة كلامه قال ايه الادب ايجاز او اسهال اوه دام قصدي اسهاب00 0

 

إخواني الأفاضل رواد المنتدى الكرام وخيرة المشاكسين فيه

تحية طيبة وحب وامتنان لجمعكم الكريم وبعد ،،،



ـ المرحلة الابتدائية وإدارة مقهى ليلي مع العمل في الفرقة في زرع القطن مع الخطوبة في رابعة ابتدائي

النضوج المبكر وسباق مع العمر ( مجالسة السهارى وأي سهارى 000 رواد المقاهي 000 أصحاب الدماغ المتكلفة فعلا 000 اللعب مع الكبار 000 ) وهواية العمل في النجارة والرغبة في إدارة البسطة

المرحوم الأستاذ الفاضل / محمد داود وحرصه على استمراري بالتعليم لتفوقي الدراسي زمان 000

ـ كنت الولد الأكبر والحفيد الأول لجدي ابو امبابي وستي ام شادلي ومحدش يسالني عن الجيران لان ذاكرتي حديدية وهفتن على كل حاجة من أول التبطيط لغاية ما هدو الخبزة وعادوها تاني مش الفطير قور



ـ المرحلة الإعدادية مرحلة الشطرنج والقراءة والتنس والكرة والسباحة وجمع القطن وبداية الكتابة

والسماع لبرامج الراديو الخاصة بالشعر والأدب وهمسة عتاب وعلى الناصية ومن الجاني وخلافه

الحب العلني وبنت الجيران 000 وبقي السؤال هل يمكن أن نعيش بلا حب أو بلا حب كلاها صعب

رفضت بيع ريادة الفصل للدكتور جمال سعد البيلي مقابل ربع جنيه برغم أن المبلغ كان مغري جدا

ـ كنت بعوم في البحر الجديد ورجلي اتفتحت لاني نزلت من على السلاسل 000



ـ المرحلة الثانوية التشتت الفكري والديني ومرحلة التخبط الدراسي وحكاية محل الفول والطعمية

بداية تربية الإخوان وعلاقتي بالمساجد والكتب الدينية وما موضوع التصوف 000

الشعر والقصص 000 إعادة كتابة الموضوعات 000 النقد الدائم وعدم الرضا عن أي شيء

الحب الخفي الرومانسي 000 أخت صديقي 000 كلهم بيحبوني 000 وأنا كمان 000 بس

الشغل متعهد أنفار في الوسية 000 وتحقيق أعلى دخل في أقل زمن 000 خولي الفرقة 000

جمع القطن 000 شراء عجلة في الصيف وبيعها وشراء مكوة في الشتاء وبيعها كل سنة 000

حكايتي مع كلية الإعلام 000 ونصيحة عميد الكلية لي 000 لفيت كليات البلد على الفاضي



ـ المرحلة الجامعية عدم حب الدراسة بالكلية والشطرنج والتنس والقهوة والسهر وضياع الهدف

العمل في مطعم ومصنع بلاط ومصنع تغليف وحكاية بور سعيد ( الجرابعة ) والعريش المطعم الفلسطيني

الصداقات المتعددة والجرأة مع البنات في الحوار وخلافه 000 لكنها الهدنة مع الحب ربما الخوف 000

وقد يكون الوعي بالمسئولية 000 كنت أسبق فترات حياتي حتى أني أظن أني سأسبق في الوداع أيضا

رحلتي مع تفسير ابن كثير والظلال وغيرهما من الكتب الدينية وعمل بحوث ودراسات مقارنة 000

الخطابة صدفة انتهت بمرحلة طويلة من الجد لم ينهيها إلا السفر الطويل للسعودية 5 سنوات بلا إجازة

ـ بيت العيلة والبيت المنفصل مزايا وعيوب والحياة بين الأسرة الكبيرة والأسرة الصغيرة فرق كبير 000

ـ السفر للسعودية مترجم بالخبر 5 سنوات بلا إجازة وحكاياتي مع الترجمة 000 يوم الدخل العالي 00

تنقل العمل في مكتب الترجمة 000 قصتي مع العامل الهندي سليمان والسائق الهندي صامويل 000

التضحية بالوظيفة الحكومية مقابل الدخل المادي العالي من اجل بناء مستقبل أفراد الأسرة جميعا 000

قصة الحج وما واكبها من أحداث غريبة 000 سنة حريق منى 000

متنسوش حكايتي مع الفورد ثمانية سلندر 000 بألف وخمسمائة ريال 000 وليه بعتها 000

حكايتي مع الرسم والموسيقى 000





ـ قصتي مع الزواج من أم إسلام 000 وهي في الصف الأول الجامعي 000 وما سر تسمية إسلام 000



ـ قرار انسحابي من جماعة الاخوان قرار فردي وشخصي 000 رغم نجاحي في وسط الجماعة وحبي لهم



ـ ورفض عرض بالزواج وكنت على حق في رفضه ( بادرت به أخت داعية لكنني رفضت الفكرة لماذا ؟ )

ـ بنت الجيران رفضتني قبل السفر وقبلتني اثناء السفر وخطبتها لمدة 24 ساعة وانسحبت 00لماذا ؟

ـ حزنت لعودت والدتي مرتين من السعودية بالعمرة فقط بدون حج لنقص الإمكانيات

وفرحت جدا لما حجت في الثالثة وعقبالكم جميعا من أول مرة

ـ السفر مرة ثانية للسعودية مترجم ولكن بشركة أفراس بالرياض وما قصة مدير المشاريع الفلسطيني



ـ دارت الحرب ضدي فكرهت الرجوع برغم وجود عودة في جواز السفر 000 كرهت السفر 000 لماذا ؟



ـ قصة مكتبة ومطبعة الإسراء ومصنع إسلام للكراس والكشكول 000 شراكة 000 وفض شراكة لماذا ؟



ـ عرض علي اكثر من مرة الحوصل على كارنيه حزب وطني يعني لتسهيل المصالح أوخلافه

لم استوعب الفكرة موضوعا ولا شكلا ولم يطيب لي قبول ذلك ولو لم تتسهل المصالح



ـ حكاية بيتاني في القسم ليلة كاملة مرتين بسبب المكتبة 000 وعرضي عل النيابة مرتين 000



ـ قصة إنشاء مكتبة الإمبابي والسفر للعراق تسعة شهور 2008/2009 وما قصة الترجمة هناك

ما سبب السفر في هذه الحرب المغامرة وما سبب عدم العودة برغم الوعود الرائعة 000



ـ كان لي دور بسيط على النت في موضوع الثورة منذ فترات طويلة لكن هذا الموضوع مغلق لرغبتي الشخصية في عدم الخوض فيه 000 لكن بأمانة والله عملت أكثر من المطلوب مني وبتفاني000



ـ قمت بإعداد برنامج رائع للترشيح نقيب معلمين لكنني انسحبت من الترشيح قبل أخر يوم

( كروان المنتدى ) جيوكاندا ما قصة الانسحاب 000 أخشى أن افشل في الانسحاب من برنامجكم 000



ـ وأخيرا انسحبت من نخلة الخير 000 برغم أن الفكرة جميلة وقابلة للتطبيق والنجاح بنسب موثوق فيها



ـ انتظروني في موضوع جيد في مجلة نادي برمبال تحت الطبع إن لم انسحب طبعا 000



ـ اه لو حكيت لكم يوم من ايام الدراسة في الشتاء الماضي او الي قبله بالتحديد



ـ عندي دراسات جميلة وعلمية لتطوير التعليم ومشروع مدروس للإعداد للتقديم لعمل مدير مدرسة بالنظام الجديد العام القادم ( التقدم لإدارة مدرسة لمدة عام ) قرار وزاري جديد ( ربنا يستر ولا أنسحب )



الحاجة الوحيدة إلي نفسها أعملها في حياتي 000 نفسي أعمل قارب وأصطاد في البحر الجديد



أه نفسي أتعلم الموسيقة وأفهم النوتة الموسيقية وأقدر اعمل حاجة لها معنى على العود 000

 

اختارلكم يوم 000 اما لو هختار انا 000 هختار يوم من ايام إدارة المقهى 000

 

الاخ الفاضل نهاد سليم
بعد التحية والشكر لشخصكم الكريم وبعد ،،،
البطاقة الشخصية
الاسم / إبراهيم محمد السيد السيد إمبابي محمد لويح
مدرس لغة إنجليزية بمدرسة الحاجة كاميليا الاعدادية بنات حاليا
السن 42 سنة مواليد 20/10/1969م
زوجتى مدام / عزه محمد موسى محمد العدوى
ربة منزل / حاصلة على بكالوريوس تربية نوعية تكنولوجيا تعليم بتقدير جيد
الأولاد أربعة والخامس ملهوش نصيب يكمل ( تفريغ )
اسلام رايح صف سادس ابتدائي سلمى رايحه صف رابع ابتدائي
هشام رايح صف تاني ابتدائي يوسف رايح على منتصف العام الثاني من عمره وهو الأخير
من سكان منطقة المباني ـ بجوار مسجد أبو شتيه وبجوار الملعب الجديد بالمباني

 

الزميل الفاضل والصديق الودود الأخ محمد داود بعد التحية

سؤالك صعب لكن انا موجود اهوه وتحت امرك وفي انتظارك لو كان لنا عمر

وكدا الحمد لله جاوبت على سؤالك على خير 000

ما الأسئلة سهلة امال بتخوفونا من الامتحان ليه يا اخوانا انا مذاكر كويس

محدش يحاول يخوفني اصل اعملها وانسحب 000 ما انا متعود

 

اخي الفاضل ابراهيم نعينع بعد التحية والتقدير

حاضر أي واحد هيختار يوم مباشرة هبدأ الكلام فيه قدر الإمكان وفورا إن شاء الله
ويا ريت تختار اليوم الي يعجبك وشكرا

انا مش عارف اختار اي يوم كلها ايام شكل بعضها

 

الاخت الفاضل / فاطمة تحية تقدير واحترام وبعد ،،،
بقدر ما تسعدني ردودك وكلماتك المادحة لي بقدر ما يؤلمني ضميري لكثرة نداء البعض بالاستمرار
بل وعرض كم من المساعدات ليس بالضئيل 000
لكنكم لا تعلمون كل شيء وليس بمقدوري الحديث عن كل شيء خاصة إن لم يكن ملكا خالصا لي ولي حق الحديث عنه بدون توسيع الخلافات واشعال الفتن والمهاترات 0000
فصبر جميل والله المستعان ودوما لكل زمان ومكان رجاله المناسبين والمناسبين 000
وعزائي أنني لست وحدى بل كثيرون مثلي وفي نفس الظروف وكبي وبيست
( قص ولزق )
اعتقد بأنني اجبت عن هذا السؤال في سرد ايام حياتي لكني استبدلت الارقام بمراحل عمرية على اي حال حضرتك اختاري اليوم وانا ذاكرتي في الأرقام خاصة حلوة قوي لغاية قبل الزواج
حماتي نستني كل الارقام لكن انا هتصل بصديق واجاوبكم بكل سرور وحتى لقاء

 

والله يا استاذ ابراهيم يوم المدرس مننا معروف و روتينى جدا . بس الناس مش مركزه الا فى الدروس الى بيديها بس .

ما يعرفوش ان التدريس اصعب مهنه فى الدنيا .

يلا قول يومك ازاى واحكى عن الزملاء لانهم وحشونى جدا بالذات ابراهيم عبد اللطيف .

تحياتى للغالى

 

الأستاذ العزيز ابراهيم امبابي
شرف لنا جميعا وجودك بيننا
بصراحة أجمل حاجة عندك بساطتك ربنا يديمها عليك طبعا بالاضافة أن حياتك مليئة بالكفاح
ربنا يبارك لك في عيالك ويعينك على عمل الخير
السؤال اللي محيرني ازاي شخص كان يعمل في مقهى ولديه كل هذه النجاحات والمحاولات التي أبدا لاتنتهي ولاتقف وياترى المقهى أثر في حياتك وماهو نوع التأثير إن وجد ؟
حبيت بس أرحب بيك وأبدي اعتزازي إني تعرفت عليك هنا أدام الله عليك تواضعك ومحبة الجميع

 

احم
السلام عليكم
انا جيت
(هات المسن التانى ياد ياعوض المسن ده بتاع يوم ابو تسنيم)

قبل اى حاجه ارحب بضيف البرنامج الاستاذ ابراهيم امبابى اللى منور البرنامج
وطبعا الاستاذ نهاد زمانه بيقول ايه اللى اخرنى
معلهش ياسيدى كنت بشغل جهاز المخابرات بتاعى وبنشوف ايه اللى هيقدر يجبهولنا من معلومات سريه عن الضيف

ونرجع بقى للضيف
سؤالى بسيط خالص يا استاذ ابراهيم
طبعا ايامك فى المكتبه بتكون مشحونه وبتشوف اشخاص كتير
بس مين الزبون اللى ما نسيتهوش ابدا وفى موقف معلق معاك منه
وممكن ما تذكرش اسمه لو الموقف محرج يعنى

ثانيا انا اعرف ان عاصم الصبرى البط خلق الله بيتعامل دايما معاك
فقولنا موقف ما بتنساهش منه
انا عارفه لبط
وبكده اسالتى انتهت وليا عوده تانيه ان شاء الله

(واد يا عوض انت فين ياد )

سلام عليكم

 

 

بسم الله الرحمن الرحيم
اسمحوا لي اقلبها فضفضة حرة معاكم من واحدة لواحدة ونصف بس
وانا هتكلم عن يوم في التعليم حسب طلب الأخ الزميل الاستاذ / محمد داود
بداية وبصراحة كدا انا لما بصلي الفجر بقوم الساعة 6.30 ولما أكون هصلي الصبح بقوم الساعة 6.00
بسمع صوت المنبه الصبح وساعتها بطنش واعمل نايم بتقوم ام اسلام تطفيه وتنده على الأولاد يدخلوا الحمام استعدادا ليوم دراسي جديد وبيكون الدور عليه لما يكون مزاجها حلو بتقول قوم يا خليو يله
مزاجها عادي بتقول قوم يا ابو اسلام مزاجها تحت العادي بتقول قوم يا استاذ يله
انا الرد الاول كل يوم بشد الغطة عليه واسال هو النهارده مش اجازة ترد لأ مش اجازة
اجاوب طيب سيبيني النهارده عارضة وبنام فعلا مبسمعش الرد لاني حافظ الي هتقوله معدش عندك عارضه أو سيبها ليوم يكون فيه حاجة طارئه أو فيه دراسة والبنات هيتاخر منهجهم
هي بتخلص اكون انا خدت غفلة كدا يبدأ الحوار التاني دماغي مصدعة تقولي عملالك قهوة
طيب بطني بتوجعني قوم بقه اتاخرت الساعة 6.30 هي بتكون مش ونصف انا عارف انها بتكدب الساعة 6 يا هانم هي النصف ساعة دي مش وقت المهم لما توصل عند اتفضلي يا حاجة ( بتخوفني بامي ) الاقي نفسي خت دش وواقف على السجادة بعدها بلبس وبرده حسب المزاج لو ميه ميه عند ام اسلام بتلبسني كل حاجة حتى الحذاء داخل الشقة لو مش حلو يبقه كل حاجة عندك اهوه حتى لو كانت حاجة مؤنث مبتقولش عندك اهي وبطلع من البوابة عادة 7.10 بكون في المكتبة 7.15 تقريبا بعد طبعا ما اصبح على الحاجة في الدور الأول انا في الثالث والاستاذ عيد محمد السيد امبابي اخويه في التاني مدرس حاسب آلي بمدرسة الرياض الثانوية الزراعية وشريكي في مكتبة الامبابي مناصفة وبعد كدا بقضي حوالي 5 دقايق في المكتبة كالمعتاد اصبح على الابله الي معانا واذا كان فيه شغل حاجة مثلا هتسلمها بطلعلها او هتعملها لما ارجع اخدها وكدا يعني 7.20 دقيقة بتوجه للمدرسة تقريبا 7.25 بكون في المدرسة بيبدأ يومي من دخول البوابة الي له طلب بوصلهوله من هيئة التدريس ولازم اسأل على مجموعة كدا بمجرد الوصول لما يكون ابراهيم عبد اللطيف مش موجود يبقه يوم ربنا يعديه على خير دا التوأم بتاعي بس هو ميزته عني مكبر قصدي مطول دماغه مشكلته الرئيسية معايا انه علطول في الدور التاني وانا في الأول ( فرق الطول ) بس انا بقف على شماله علشان يبقه صفر 01 ملوش قيمة مبرداش ابدا اقف علي يمينه علشان ميبقاش قيمته عشره 10 برده بمقياس فرق الطول فاهمها طيب اه كويس وبعدين بحب اتفقد الطابور كدا اسلم على الموجودين من المعلمين ولو كان يوم اشرافنا يبقه هنشيل الليلة بقه مين موجود من المدرسين مين غايب مين متاخر من الطالبات مين يدخل حصص الاحتياط ولو الموجه موجود يبقه هحاول اخده عندي الحصة الاولى في فصلي حتى زميلاتي تتفادى وجوده كده في الولى على الصبح لانه بيقعد الحصة كاملة ومبيفوتش انتقاد ابدا المهم انا لو جتني تعليمات في صالح الطالبات حتى لو من طالبة بنفذها بكل سرور اما تعليمات كدا روتين فانا اكبر دماغ ممكن اشرح حصة 100 % والموجه يطلع مبسوط جدا عادة لكن لما يجي للروتين الممل دفاتر وكراسات وتوقيع هنا وهناك مبركزش قوي الاجابات متوفره اه طيب كويس جميل حاضر وبعد الحصة اروح افطر ويبقم يدوروا عليه براحتهم وبعض الطالبات بتحاول تظهر في وضع غير طبيعي بطلب منهم يخلوا كل حاجة على وضعها انا عايز الموجه يشوفني اشتاذ زي ما كان استاذ انا مش ملاك طبعا بروتوكول الفطار لانه انا في البيت باخد قهوة مع مخبوزات خفيفة جدا عادة بشتريها يوم الخميس من منية النصر في السهرة كدا بجيب بجنيه كدا محنا 7 بيفطروا منها كل يوم دول الي رايحين المدرسة انا و3 اولاد وعيد وولدين واحيانا زوجتي وزوجة عيد ووالدتي وغالبا دول بيفرشوا على الاياس ويفطروا بقه مبيخلوش بيمسحوا مسح المهم انا لازم قبل عشرة اكون فطرت والا والله اقف زي البوتاجاز الي انبوبة فضيت تماما يعني دا بروتوكول يومي غالبا بفطر في المكتبة مع تجهيز شوية حاجات كدا كشغل يعني امتحان اكسرسيز ورقة كمبيوتر طلب لحد بحسب الموجود مفيش اهوه بتصفح شوية نت وانا بفطر وارجع المدرسة تاني اكمل حصصي وغالبا بيكون عندي الاخيرة يعني بمشي من المدرسة بعد الساعة 2 بدون مبالغة يوميا من الأحد للخميس بروح البيت اتغدا غالبا سمك كشري محشي مدور وأحيانا لا سمح الله بيبقه فراخ أو بط ( بس بصراحة إلا بط ام ابراهيم وبط حماتي كمان للأمانة دا كويس وخاصة بتاع حماتي لأنه لما بيجي معناه فيه رضا فكل حاجة بتبقه مضبطه وبعدين الي يجي م حماتي فايده ما انا بتقلب كل يوم من بنتها مجتش على بطة كل شهر وبعدين انا مبتعزمش عند حماتي غير كل جمعه بس بعد ما تحلف عليه لتفكروا انني بروح بالسهل كدا وبعدين غدا بس مرة ومرة لما بقعد للعشا لازم اخليني خفيف ومبنحبش نشيل واحنا راجعين هما الي بيبعتوا ورانا أكل يومين ثلاثة مبخلهمش يكثروا ) المهم في الغدا مرات زيارات كدا بيبقه عندنا ضيف اسمه لحمة بس دا بيغيب في المجي بيتنا باين مش قريبنا قوي يعني وطبعا اكلتي الشخصية المفضلة بعد السمك بانواعه والكوارع العدس انا بموت في العدس ( بشرط يكون عدس ام ابراهيم ) يعني عدس بجزر وثوم وبطاطس وشعريه وبهارات اللحمة ويكون بين السائل واللزج أو الكشري بس يكون كشري حماتي يعني كشري بعدس او فول حراتي وجنبه طبق بدنجان وبيض مقلي وبطاطس دواير وسلطة طماطم مع جزر مع فلفل مقلي مع عودين جرجير أخضر ويكون فيه حتة مخلل من انتاج ام اسلام كدا ان متوفرش يبقه جبنه فيها طماطم مهروسين في طبق كدا ( الله يرحم ايام زمان كنا بناكل صنف واحد يمكن احكيلكم لو طلب مني عن يوم في ايام الغيط والجمع بتاع زمان ) احنا كنا واحنا طلبة الي ياخد سندوتش تخديله يبقه باشا اوسندوتش حتة حدقة بس ميرضوش يعطوله قرون يعطوه مش بس القرون الفلفل الي في الحادق في البلاصي دي كانت للرجالة الكبار بس ( سبحانه ولا يملأ عين ابن ادم إلا التراب ما لم يقنع ) المهم لما كنت اشتغلت دروس فترة كدا لقيت نفسي باكل والبنات بتستناني أصلي الظهر واكل واشتغل دروس للمغرب اصلي وسط الدرس العصر والمغرب مع اخر درس وبعدين اروح المكتبة بعد المغرب كان فيه فترة كدا كنت بعطي دروس ثانوي بيوت يعني مش طويلة دي كانت بالليل طبعا كان ضغط كبير عليه لاني احيانا بيكون مطلوب مني بعض الاعمال في المكتبة زي بحوث او ترجمة او موضوعات او امتحانات او سيرة ذاتية أي حاجة انجليزي او عربي مستعجلة بالليل خاصة لما تروح البنت ونفضل انا والاستاذ عيد واحد بيبيع والتاني بيشتغعل على الكمبيوتر لو فيه شغل يعني ربنا يسترها من عين محمد داود هخلي وائل الشافعي يشوفلي قلوحتين وبخور وبتاع فار يتيم وكدا يعني طبعا برجع البيت لبروتوكلات جديدة خالص بقه عشاء مع وقت كدا للأولاد على المستعجل والله وبعدين امهم برده بتكون محوشالي اليوم من الاول مضطر اقول اه وبعدين هيه طيب جميل ما شاء الله بكون فاتح الكمبيوتر او بتعشا او بكتب او بقرأ او حتى بسمع شوية قرآن او اخبار واحيانا موسيقى او غناء حسب المزاج 000 المهم في مرة بتقولي امي تعبانة ورايحه تكشف بكره في المنصورة اروح معاه بقولها اه كويس جميل بتقولي هو ايه الي اه كويس جميل قلتلها فوق العشر سنين بقولك اه كويس جميل وبتعجبك المرادي غلط يا ستي عديها بهزر هو انت كنت بتقولي ايه اخيرا اتكشفت اه طيب كويس جميل بس انا كنت بقولها على حاجات معزور فيها طبيخي ولا طبيخ امك غسيلي ولا غسيل اختك البيبسي بتاعي ولا بيبسي المحلات كدا يعني وانا اتعودت اجاوب من غير ما انتبه ومشت معايا حلو لولا حماتي ومرواجها للدكتور هي كدا الحموات ميجيش من وراها غير كشف الاعيب الرجالة المهم المدام زي الحصص كدا يعني هتشرح هتشرح في كل الحالات وتسمع وتبتسم للحلو وتكشر في الوحش وتقول وتعيد وتعيد وتقول من تاني وتخلي الي عمره ما قرا انجليزي يقرأ شوف البال بقه لما واحدة زي ياسمين تقرأ سطرين انجليزي لكن بستناها والأكثر بالا بقه لما اطلب من ندى تعيدهم أو اخلي مها الي مبتقرأش عربي تقول بعد ندى تبقه حصة مزيكا تنسى فيها ان عندك مرارة او حتى حجاز حاجب وتوسع كل حاجة في الدينا دماغك وودانك وعينيك ومضطر تظهر ابتسامة وتهز راسك اه ام اه يعني كانك بتزق عربية كاروا طالعه مطلع واهم حاجة انك تنسى علاقتك بقواعد القراءة هي كفايه عليها تعمل صوت انجليزي ملكش دعوة بذا ولا زا وس ولا ث بدون تعليقات لازم تشكرها بعد المجهود دا
واه لو عندك اثنين ثلاثة من الي ينقطوا هما ممتازين بس هيسالوك ويوروك وانا مضطر اقول اه جميل رائع ولازم تبص عند شفاء زي ما بصيت عند ام الهنا وام الخير لحسن تزعل وممكن تتصل على بابا بره تقوله بص في كراسة سعدية وفوزية وسبني وكشر كمان دي اضافة لابد من حدوثها ما علينا
وانت مضطر لو قلت لابتسام شكرا تقولها لعشرة ولو شخطت او كشرت في منى تكشر في عشرة
بذات البنات لازم المدرس يكون على وعي بالعقول طبعا ثم المشاعر وفهم النفسيات
انا بكون ماشي في الطرقة لازم في اخرها يكون في ايديه شوية حاجات كدا قلبز شيبسي نعناع بسكوت ماريو فاريو باريو المهم تكون ايديه مليانه وانا رايح كدا واوزعها احيانا وانا راجع كدا لازم اشاكس رايح جاي خاصة لو كان فسحة مع معلمين زملاء او طالبات والاكثر طالبات مع الكل انا لولا بكون في الشارع مستعجل هيبقه كدا برده لاني بحب الناس وبحب اشاركهم لو في حباية شكولاته بسيطة متفرقش من عندي ولا من عندهم ولما بكون طالع رحلة باجر طبلة وبجيب لبان ولب ونفافيخ وشيبسي وشوية حاجات حسب ما بيكون متوفر لي من ميزانية ساعتها وصفارات زي ما حصل السنادي كدا وبكون في وسط البنات في الرحلة معلم واب واخ وزميل وصديق بدون أي مبالغة والي طلعت معايا تشهد بالكلامدا
انا كثير صديقات لي لدرجة كبيرة جدا مرة اقسم بالله العظيم طالبة في ثالثة اعدادي والدها جالي علشان يطلب مني في البيت اصالحها عليه وعندي علاقات قوية جدا بعدد كبير ودايما انا همسة عتاب بتاعتهم وبامانة شديدة وبمنتهى السرية بعرف احافظ على ما يعتبرونه اسرارهم حتى ولو كانت حاجة هايفه المهم انا بعتبر المدام زيهم كدا حصة 40 طالبة لواحدها دا اذا مكنش زيادة المهم كدا ولا كدا الجرس بيضرب وبتدخل في النوم انا مشكلة حياتي السهر نادرا لما بنام بدري قبل واحدة دي تقريبا ملغية من حياتي من وانا في الابتدائي هبقه اقولكم ليه في يوم القهوة والمعلم ابراهيم المهم هنا انا مش كل ليلة لكن احيانا بفتح النت او التلفزيون او الاثنين معا احمل واتفرج كدا المهم لي مع النت رحلة طويلة من سنين وانا مشترك انا بدات مع الكمبيوتر سنة 1989 تقريبا مع المرحوم المهندس علي يونس عند المهندس محمد شعيب اول جهاز يجيبه المهم عندي كام ايه ميل كدا ببص عليهم واتنقل سريعا طبعا بدخل في كل حاجة في حياتي على المطلوب معنديش وقت اسمه فاضي الا يوم الخميس من بعد العشاء والجمعة دولا كاملين ايام ويك اند والسبت يعني نصف نصف يبقه للعيال شويه حقهم المهم بقوم من على النت لما الاقيني بنام وانا بشيت مثلا ابقوا فكروني احكيلكم يوم ما نمت وانا سايق في السعودية انا اجدع واحد ينام وهو في مكان العمل لو بطلت شغل ومعنديش حاجة اعملها ممكن انام في غضون عشر دقايق بالكثير مرة نمت في دورة تدريب انجليزي اسمها اسبكترم وانا مدرس لسه خريج والدكتورة قلتلهم سيبوه وصحوني في نهاية المحاضرة بعد حوالي ساعتين بيبقه موقف ممكن يحرج الواحد بس انا مبعطيش الوضع اكبرمن حقه
ونجحت في الدوره بامتياز والله رغم اني شبعت فيها نوم مش كل حاجة لازم تتعمل ميه في الميه
على فكرة ليه نسبة 10 % اخطاء من أي نوع انا من النوع الي بقبل اقل حاجة عشرة في الميه أخطاء
من أي حد في أي موضوع ودي مشكلتي مع والدتي وزوجتي دايما في البيت عايزني احاسب الاولاد على كل حاجة يعني ملا هشام يروح الحضانة ويرجع اول يوم من غير ادواته احاسبه امه بتنده عليه ومزنباه قولتيله تعالى يا هشام هي فكرت هضربه سالته فين ادواتك مجبتهاش ليه محدش قالي هاتها قلتله صح الراجل محدش قاله يجبها فاتشجع هوه وقال وكمان انا في ايدي دي كيس قلبز وفي ايدي دي كيس شبسي اجيبها فين قلت اه بالضبط في دي قلبز وفي دي شيبسي يشيلها فين ام اسلام وسعي صدرك طبعا هي وامي مرارتهم اتفقعت مني علشان اضرب عيل لا يمكن الا لسبب قوي وبالخرطوم البلاستيك او العصاية على ايده بس او رجله ان تهورت وبحب أكون كدا قدام أي موقف في الدنيا مش لازم يبقه 100 % لانه كدا الذ واجمل ويقبل التعليق عليه وتكراره 000
وإلى لقاء في يوم آخر من أيام القهوة حسب طلب الأخ الزميل في الفضفضة / هاني البسطويسي
والي عنده نصيحة ميبخلش عليا علشان اتبعها في الايام القادمة لو منسحبتش من الموقف الصعب دا
كدا مرضي يا عم محمد يا ابو داود ولا نعيده ونقوله 000 عاشر 000 تقبل تحياتي
على قدر حبي لك شبعتك علشان تتسلى عندك في الغربة على كيفك
يله علشان انزل اصلي الفجر وطويلة طويلة والله ما أنا منقح ولا معدل ولا كلمة 000

 

حبيب قلبى الأستاذ / إبراهيم إمبابى

أحلى ما فى كلامك هو التلقائيه والصراحه المتناهيه والتى قد تكون صعبه فى بعض الاحيان على صاحبها للبوح بما يجول فى دواخله ومدى تقدير الناس لها .

وبالفعل هذه الكلمات الصادقه أسعدتنى جدا وفى نفس الوقت أحزنتنى كثيرا .

أسعدتنى لأننى فعلا تأكدت انه ما زال هناك رجال محترمون بالفطره ومجاهدون ومكافحون فى الحياه . يحبون العمل والجد والتحمل من أجل عيشة أفضل . وكذلك ذكرتنى بأيام زمان والغيط والجمع والفرقه والرز والاستحمام فى البحر الجديد . والعويم الى يعدى البحر مرتين وينط من على الكوبرى من فوق . كنا فى هذه الايام ما عندناش ولكن كنا فى غاية السعاده .

وأحزنتنى كثيرا لأننى لم احاول معرفتك عن قرب الا فى الفترات الاخيره . فأنت انسان محترم جدا وخلوق جدا ومؤدب جدا وبشوش جدا وسهل جدا . وهذا ما لا اجده فى كثير من الناس .

جزاك الله عنا خيرا وبارك لك فى نفسك وفى أولادك وأهلك وفى مالك .

وددمت صديقا وزميلا وفيا أعتز به وبمعرفته .

محمد داود

 

اقتباس :

وبعدين انا مبتعزمش عند حماتي غير كل جمعه بس بعد
ما تحلف عليه لتفكروا انني بروح بالسهل كدا وبعدين غدا
بس مرة ومرة لما بقعد للعشا لازم اخليني خفيف ومبنحبش
نشيل واحنا راجعين هما الي بيبعتوا ورانا أكل يومين ثلاثة
مبخلهمش يكثروا

يابختك بحماتك بجد يااستاذ ابراهيم ،، على فكره احنا مش
بنحسد احنا بِنأُر بس ههههههههههه ،
لو ام اسلام لها اخوات بنات لسه متجوزوش وعاوزين عرسان
احنا موجودين اهو ،، بس اهم حاجه تشوفلنا موضوع العزومه ده

بجد احلى مافى الموضوع زى ماذكر الاستاذ محمد داواد هى التلقائية
فى الحوار وعدم التكلف بالاضافة الى المصداقيه فى الكلام

شوف بقى يااستاذ ابراهيم عاوزينك تكلمنا عن مكتبة الامبابى
كيف جاءت الفكره من البدايه ،، وهل حدثت مشكله مع مكتبة الاسراء
لذلك جاءت فكرة الاستقلالية ،، وكيف حققت مكتبة الامبابى هذا النجاح ؟

 

ابراهيم محمد السيدامبابي كتب:

بسم الله الرحمن الرحيم

ـ قرار انسحابي من جماعة الاخوان قرار فردي وشخصي 000 رغم نجاحي في وسط الجماعة وحبي لهم

 

استفدنا منك كتيير يا أبو خليل

 

استاذى العزيز

كنت على ثقه عند اختيارى لشخصكم الكريم انك ستثرى البرنامج

وتضيف المزيد من الروعه للبرنامج فأنت حقا انسان رائع

فأنا اعلم انك ورائك قصه نضال وكفاخ انا شخصيا افخر بها

واعتبرك مثل ومن هنا لا اريد ان انسى ان ورائك ام عظيمه

اعرفها عن قرب ام يفخر بها اى انسان فشكرا جزيلا لهذه

الام بقدر ما اعطت وبقدر نضالها وكفاحها

وبعدين يا اخى الكريم عاوزك تضعنى معاك كده فى جمله مفيده

كلمنا عن ايام الفرقه والايام الخوالى وبعض المواقف الطريفه

التى صادفتها التى من الممكن ان نخرج بها بشيئ من الفائده

دومت بكل خير