تذكير بمساهمة فاتح الموضوع :

 

الحقوووووووووووونى يا جماعه حد يصرف لنا العفريت ده

الملقب بفاكهه المنتدى المدعو ( ابو حمزه الجمل ) فيه ايه

ياعم ابو حمزه انت مذاكر كويس انا بدأت اخاف منك لآن

طبعا اكييييد فيه حاجات مفيش حد عارفها انا كده بدأت اقلق منك

وبصرخ لو حد يعرف يصرفك انا تحت امره

عموما هجاوب عليك بس واحده واحده لان لكل سؤال قصص طريف

اتمنى ان اسردها لكم جميعا وان شاء الله محدش هيصرفك غيرى

 

جيوكاندا فيييييييينك انا عملت لك توكيل بصرف العفريت

اتمنى ان اجد منكى الحمايه لان ابوحمزه نازل على بتقله

بس ربنا يقدرنى وان شاء الله اكون عند حسن ظنكم

 

اخوتى الاحباء اعضاء منتدانا العظيم والجميل

بناء على طلب من العزيز الغالى الاستاذ / هانى البسطويسى ( ابو محمد )

سأقص لكم قصتى مع الغردقه والتى اعتبرها قصه نجاح وكفاح عل وعسى

ان يستفيد منها احد او تغير بعض المفاهيم الخاطئه لدى البعض

البدايه كانت مع انتهائى من التجنيد سنه 1994 لقد وجدت الدنيا امامى ليست

ورديه كما كنا نحلم فالفرصه لن تأتى لك ولكنى امنت ان الهدف والغايه لابد

لك من السعى اليه وليس انتظاره فلقد عملت بهذا المبدأ وخصوصا اننى ولظروف

قاسيه اتشرف بها كنت العائل الوحيد المطلوب منه ان يوفر احتياجات اسره

مكونه من ام وشقيقين وايضا ان اعمل لنفسى مستقبلولسوء الحظ وقتها كان السفر

للخارج صعب والاجور زهيده وكمان تمن الفيزا لم يكن متوفر معى لذلك فكرت

فى الغردقه كمحطه او بدايه مشوار والحمد لله وبتوفيقه كان الاختيار المناسب

فلقد سافرت عن طريق رجل فاضل مازلت اكن له كل الاحترام لانه ربنا جعله

سبب فيما وصلت اليه الا وهو الحاج محمد ابو المعاطى السقا وهو زوج خالتى

وفى منزله خالى بارك الله فيه المهم وفر لى فرصه عمل فى المعمار ولمن

يعرفنى جيدا يعلم انى كنت لا استطيع القيام بهذه المهمه الشاقه ولكن ما باليد حيله

فأنا كنت فى حاجه ماسه للمال ومن الطرائف انى كنت احمل شيكاره الاسمنت فى

البرويطه والعامل الصعيدى كان بامكانه حمل 2 شيكاره من الاسمنت ولكن فى هذه

الشغلانه قعدت فيها 10 ايام وجائتنى الفرصه للعمل فى سوبر ماركت براتب

شهرى 150 ج وكان اسوبر ماركت امكانياته ضعيفه ولكن موقع المحل كان جيد

جدا وبدأت انجح بامتياز فى اداره السوبر ماركت ولكن الراتب ضعيف لا يكفى

لعمل ما احلم به وفى يوم من الايام جاءت الفرصه فلقد كان هناك تاجر كبير

جايب لنا بيض فى المحل فقلت له من باب المزاح مفيش حواليك مصلحه

ياحاج محمد وكأن باب السماء كان مفتوحا فرد على اقسم بالله الحوار هكذا

قال انا تحت امرك قلت له يعنى ايه رد البض ده دهب ابيض رديت ازاى

قال ممكن تطلع شويه توزع بيض للمحلات ممكن ربنا يكرمك ب 200ج

او 300 ج فى ساعه رديت عليه انا عاوز اشتغل رد لنا تحت امرك قلت

ممعييش فلوس رد من جنيه ل 20الف قلت ممعياش عربيه اوزع بيها

قال خد عربيتى ووزع بيها قلت ابدأ بكام طبق قال ب 500طبق وفعلا

قبل ان اطلب منه ذهبت للمحلات التى اعرفها وعرفتهم ووزعت البيض

قبل ان يأتينى ومن هنا كانت البدايه وبدأت كل يوم ازود المحلات اللى

معايا وربنا اكرمنى ومع العلم هذه التجاره كانت فى وقت فراغى لانى

لم اترك العمل فى السوبر ماركت كنت بوفق الوقت حتى لا يتعارض

عملى فى السوبر ماركت مع تجارتى التى تدر على ربح كويس

والحمد لله لقد كان نجاحى يفوق الوصف لانى كنت حابب ان انجح

وكنت محتاج ان اجرب العيش عيشه رغده ولكن بكفاح وما احلى

ان تشعر بنجاحك وتمر الايام وبدأت ازود الاصناف التى اوزعها

وسبحان الله ربنا مسهلها كنت اتاجر فى الارز وبدأت اتجه للجبن

وطبعا بفضل شخصيه جميله لابد ان اوجه له جزيل الشكر والعرفان

الا وهو الاستاذ / عادل عبد المجيد الامير الذى مهما قلت لن اوفيه

حقه ومساهمته فيما وصلت اليه المهم واصلت النجاح بنجاح وكل

كان نتاج كفاح وجهد ولا اخفى عليكم سر انى كنت اوفر وقت فراغ

وكنت اعمل ورديه من 6 ساعات فى بنزينه يعنى كنت لا اضيع الوقت

دون ان استفيد منه الى ان جاءت السنه العاصفه التى اخذت معها الكثير

سنه 2000 وكان موعدى مع حادث اليم تعرضت له مع اشقائى وقضيت

سنه كامله بين غرف العمليات والعلاج والحمد لله خرجت من هذه الحادثه

بسلام الله ولكن كان لابد ان ابدأ من الاول من تانى ولكن هنا لا يصح

ان تبدأ من الصفر لان الذى كبر لابد ان يحاول بأقصى مايمكن لكى يظل

بين الكبار فكان لدينا ميراث عن طريق والدى وبعت فدان ارض وعن

طريق الاستاذ / عادل الامير اشتريت عربيه خاصه بى وبدأت اتوسع

فى عملى اكثر واكثر وكنت اصل الليل بالنهار حتى اعوض ما فانتى

وطبعا فى وسط هذه الاحداث المتلاحقه كانهناك العديد من المطبات الصعبه

التى سأسردها فى ردى على ابو حمزه الجمل

وبفضل من الله الان اصبح لى املاك هنا فى الغردقه وبدأت الامور من الاحسن

للاحسن وبدأت اعمل الجهد الكبير لكى اكتب نهايه لهذه الرحله الممتعه

حتى اتنفس الصعداء وابدأ اعيش لنفسى واولادى واستمتع بالحياه

ولكن لسه شويه ولكن مش كتير

الاستاذ / هانى اتمنى ان اكون قد وفقنى ربى فى سرد قصه الكفاح والنجاح

واتمنى ان يستفيد منها البعض وان يبحثوا عن الفرصه ولا يجعلوا الفرصه

تبحث عنهم لانهم سينتظرون كثيرا وسضيعون من عمرهم اجمل السنوات

فى الانتظار وشكرا ولنا عوده معاك يا عم ابو حمزه

منتظر منك الكثير استاذ هانى

اتمنى ان يكون وفقنى الله

ولنا عوده

 

لا أحب أن يفوتني هذا القطار الجميل الذي يحمل بين عرباته تلك الصحبة الجميله الرائعه بتلك الروح الطيبه التى أدعوا لها الإستمرار الدائم والتوفيق السديد وبإلتحاقي بذلك الركب الطيب أحب أن أشيد وأشكر أبو تسنيم على ذلك الموضوع الرائع وعلى السداد فى اختيار تلك الشخصية الجميله وقبل أن أتجه إلى الشخصيه أحب أن أقول لأبو تسنيم باختيارك لتلك الشخصيه ذكرتني بأيام كانت من ضمن أجمل أيام حياتي التى عشتها معكما سوياً فى بعض الأوقات ولا أنسي أبداً وسأظل أتذكره دائما يوم العيد الذي قضيناه أبو تسنيم مع الصحبه الجميله فى الغردقه وبالإتجاه إلى المقصورة الرئيسية بالقطار حيث الدرجة الأولى المكيفه ذات السرائر الفخمه أقدم كامل التحيه والتقدير والإحترام والحب والأخوه الغاليه لشخص الأستاذ نهاد تقربت منك خلال فتره قضيتها معك علمت عنك وشاهدت منك كثيراً من الكفاح والمثابره والصبر وتعلمت منك كثيراً قلما تجد هذا الرجل بارك الله فيك أخي الغالى نهاد وزادك الله خيراً وعزاً وحباً للآخرين ومن الآخرين وبارك لك فى أولادك وزوجك ومالك.. تقبل مروري وسامحني لأن الكلمات قليلة الوصف ولكن يعلم الله أن فحواها يمتلىء بالكثير ...
أخوك /محمد على باشا

 

نهاد سليم كتب:

جيوكاندا فيييييييينك انا عملت لك توكيل بصرف العفريت

اتمنى ان اجد منكى الحمايه لان ابوحمزه نازل على بتقله

بس ربنا يقدرنى وان شاء الله اكون عند حسن ظنكم

 

 

الاخوه الاحباء اعضاء المنتدى / الاكثر من رائعين

مش عارف اقول ايه بجد انا لم اكن واتصور واحلم ان ارى هذه الكوكبه

من الشباب الجميل المثقف المقدم على الحياه ولم اكن اتخيل تلك المظاهره

المليئه بالحب التى تحملنى الكثير والكثير لدرجه انى لا اجد الكلمات التى

تعبر عما بداخلى وعموما اكيد انتم تشعرون بى وانى ابادلكم الحب بالحب

والمفاجأه الكبيره اليوم ان ارى شخصيه فى قمه الادب والاخلاق العاليه

نموذج من الشباب الذى بدأ حياته معتمدا على نفسه وشق طريق المستقبل

بنجاح وكان لى شرف القرب منه فى فتره هى الاجمل والاروع لى فى الغردقه

الا وهو الاستاذ الجميل / محمد على باشا فشكرا لحضورك المشرف

 

بسم الله الرحمن الرحيم
اخبارك انهارده يعم نهاد
ايه يا عم فى ايه
(الشاى ياد يا عوض)
سمعت انك حتقدر تصرفنى
ده على اساس اننى يعنى جنيه مقطوع يعنى وللا ايه
وبعدين مش عايزين لف ودوران جاوب ياعم على الاسئله
عشان لسه فى التقرير بتاعك اللى معايا لسه فيه اسئله كتير
ماشى
وخلى بالك على راى مرتضى منصور (السى دى معايا)
ههههههههههههههه
(سك ع الشاى ياد يا عوض ) ...... انا اساسا ما بشربوش
فى انتظارك يا عم الحاج
سلام عليكم

 

الاخت الحبيبه والجميله / الجيوكاندا

دائما وابدا موجوده وحاضره انا مطمن انك معايا وفى ضهرى

وانا وكلتك بالدفاع فانتى اجمل واحسن محاميه فى الدنيا

وبالنسبه لاقامتى اختى الغاليه فأنا اقيم اقامه شبه دائمه

فى الغردقه ولكن طبعا انزل البلد ولكن على فترات مثلا كل 3 شهور

او 6 واكثر ولكن اختى الحبيبه من الطريف انى اعشق تراب

برمبال القديمه ولكن لا احب النزول لها لا تتعجبى عارفه ليه

لانى لو نزلت البلد لا احب ان امشى منها وبسافر منها وان فى قمه

حزنى لانى لا اريد ان اترك تلك البلده اللى فضلها على الجميع

والقريبييين منى يعرفون عشقى وحبى لكل ما هو برمبالى

 

الاخ العزيز الاستاذ/نهاد زميل الدراسه
انها فرصه عظيمه لكى اسلم عليكم وتحياتى لك وللاسره الكريمه
اخوكم طه احمد طه معوض

 

بسم الله الرحمن الرحيم

فيه ايه ياعم انت حضرت هم بيحضروا امتى

اللهم اجعل كلامنا خفيف عليهم

انت غيرت مواعيدك ولا ايه ولا زوغت من الشغل

عموما يا صديقى العزيز انا سعيد جدا بجهاز مخابراتك النشيط

وهبدأ معاك الرد انتظر الان

 

الاستاذ العزيز الغالى نهاد ابو محمد

سعيد جدا بوجودك

واتمنا من الله ان يرعاك

انتا انسان مخلص ومكافح ولك كل الحب

والتقدير





عماد عبد العظيم حجر\ الكويت

 

 

يااااااااااااااااااااااه ماجمل هذا المنتدى كل يوم يزيد له عشقى

وولعى به كل يوم اجد منه الجديد اليوم يلاقينى بشخصيه

جميله لم اراها منذا اكثر من 20 سنه شخصيه جميه كانت

فى زمن جميل زمن يطلق عليه زمن الحب الجميل

الاستاذ الجميل والشخصيه الرائعه ورفيق الدرب /

طه احمد طه معوض

اهلا بك ضيفا جميلا بل انت صاحب بيت وانا اشكر الظروف

التى جمعتنى بك مره اخرى فأنت شخصيه تحب ان تتحدث معها

فأهلا بك وارجو التواصل لان هناك الكثير من الكلام ممكن يقال

 

الاخ الحبيب الغالى صاحب اجمل احساس

انا لا استطيع ان انساك او تسقط من هذا التاريخ الذى انت شاهد عليه

اصبر دورك لسه جاى فأنت شاهد على العصر ولا استطيع تهميش

دورك ولكن انا مش ملاحق من فاكهه المنتدى ابو حمزه نازل على بتقله

انما انت الدور قادم لكى احكى واشكيك للجميع هنا ليحكموا وطبعا الموضوع

مليئ بالطرائف اللى اتمنى ان الكل يعرفها

 

اخوتى الاحباء سألنى الاخ الحبيب ابو حمزه

عن فتره مهمه فى حياتى مع انها كانت الاسوأ على الاطلاق ولكن

كنت اشعر ان ربى يخبئ لى كل الخير ومهذه الابتلاءات الا امتحان

من المولى عز وجل ابدأ معكم

البدايه كانت 1/11/2000 واثناء سفرى انا واخوتى للغردقه حدث

حادث اليم هو الاكبر فى حياتى تأملوا كثيرا فى هذا المصاب وكل منكم

يضع نفسه مكان والدتى عليها رحمه الله وهى يأتيها الخبر ان اولادها

اصيبوا فى حادث والست دى كان لها قصص كفاح كبيره ويعلم عنها

الكثير من اهل البلد المهم دخلت على اثر هذا الحادث غرفه العمليات

5 مرات وقعدت مرض عام كامل جراء هذا الحادث ننتقل لحادث اخر

خللوا بالكم من التواريخ لانها مهمه اشتريت عربيه دبابه ( ربع نقل )

ورخصتها 17/9/2001 وبدات العمل بها 1/10/02001 واثناء عودتنا

من الغردقه فى يوم 11/11/2001 وانا نايم بجوار السواق فأذا بى اسمع

صوت ارتطام قوى جدا وانا اخترق زجاج سيارتى وتتهشم السياره الجديده

اللى لم افرح بها بعد وبدأت فى اصلاحها ولكنها لم تعود كما كانت المهم اتصلحت

فى هذه الاثناء رزقنى ربى بمولودى التانى احمد وفى يوم 15/1/2002 كنت على

موعد مع السفر وكان الجو بيشتى وكنت فى قمه القلق وانا لما بكون قلقان ينم

ذلك عن شيئ ما وكان معايا سواق جديد من البلد وقبل سفرى ذهبت لمولودى

الجديد احمد وقلت له ياترى يا احمد هشوفك تانى اقسم بالله هذا ما حدث

المهم ركبت بجوار السواق الجديد وبمجرد طلعته بالعربيه عرفت انه سوق

من منازلهم وحدثت اشياء كثيره فى الطريق دلت على ذلك نسيت اقولكم

انى كنت محمل جبنه رومى وجبنه قديمه وشويه بقاله واثناء رحلتنا واحنا

فى الاسماعيليه سمعت صوت ارتطام فسألت السواق فيه ايه نظر فى المرأه

وقال مفيش حاجه صرخت فيه انتظر ربما يكون صفيحه جبنه وقعت وقفنا

وجدنا الكاوتش هو اللى ضرب بالذمه ده يكون سواق وهو مش حاسس

بالكاوتش المهم واحنا بعد ما مسكنا طريق الغردقه السواق يجرى بسرعه

جنونيه والعربيه تروح يمين وشمال من سرعتها اللى بيعرفوا السواق يعرفوا

معنى كلامى هذا ان العربيه بتموج وليست ثابته على الارض المهم قبل

دخولنا الغردقه ب 40 ك اقسم بالله وجدتنى السياره نطير فى الهواء وتستقر

السياره على السقفيه صرخت فى السواق حرام عليك حرام عليك المهم فى

الحادث لم نصب بأذى غير ان السياره قد تحطمت وبدأت فى اصلاحها فى الغردقه

وانظروا لسخريات وعجائب القدر اثناء جلوسى مع محاسب احد الافران وكان

يحضرنا تاجر زيت من السويس واذا بالتاجر يباغتنى ويقول لى انت استاذ / نهاد

رديت نعم فقال لى البقاء لله وهنا اصفر وجهى وتلعثم الرجل صرخت فى مين

تلعثم الرجل اكثر وانا الح فى السؤال فى مين انا مكلم امى وزوجتى ومفيش حاجه

فى البلد قال لى انت مش كان عندك طفل صغير رديت نعم قال انا حضرت جنازته يوم السبت

واحنا كنا الاربعاء نسيت اقولكم ان هذا التاجر كان فى زياره لزوج خالتى فى البلد

فقمت بالاتصال على الفور بوالدتى وسألتها عن احمد فقالت هو الحمد لله وبدأ

يستجيب فى العلاج قلت لها احمد مات يا امى هنا صمتت وقالت انت عرفت منين

ازاى اقول لك وانت فى الظروف دى وانت فى حادث كيف اثقل همومك

ومتزعلش وانا عملت له جنازه كويسه انظروا لروعه تلك الام الصابره المثابره

انظروا لذكائها وفطنتها عليكى رحمه الله يا امى

المهم الحمد لله قمت من هذه الحادثه اقوى من الاول وقررت النزول للبلد

فى احد ايا شهر فبراير يعنى بعد الحادث ب شهر تقريبا لقضاء

اجازه عيد الاضحى وانا فى البيت الساعه الثانيه صباحا وزوجتى تكوى الملابس

وانا منهمك امام التلفزيون رن جرس التليفون وجاء الصوت القادم استاذ /نهاد

نعم قال عربيتك مقلوبه فى البحر الجديد عند كفر علام جريت فى الشوارع

وتمنيت ان يكون الخبر كاذب ولكنى صدمت بالحقيقه ان اخى اخد العربيه هو

اصحابه ليتفسحوا بها انظروا فى ليله العيد الكبير ولم يكن هناك عيد

بل اللى جاء جاء ليواسينى فى مصابى ودى يا ابو حمزه كانت اخر الحوادث

لانى عملت رخصه وسقت عربيتى بنفسى وطبعا الموضوع ده لا يخلو من الحسد

وطبعا خلصت اقساط العربيه وقمت ببيعها وهنا اذكر رجل فضل جعله ربى

سببا فيما وصلت اليه الاستاذ عادل عبد المجيد الامير كان ورائى ويشجعنى

ووقمت من هذه المحن اقوى من الاول ويحضرنى المثل القائل

المحن تصنع الرجال

ماشى ياعم ابو حمزه وانتظرنى بعد قليل لاحكى لك قصه جائزه التليفزيون

التى لا تخلو من الطرائف الجميله ولكن بعد قليل

 

الاخ العزيز عماد ابو حجر

متشكر ليك دائما حضورك المميز وانت ايضا مثل

فى الجد والاجتهاد ربنا معاك ويوفقك ويعينك عل غربتك

 

بصراحه استاذ نهاد مش عارف اقول ايه ولا أسأل ايه
بس فعلا كل هذا من علامات محبة الله عز وجل لك
فالمؤمن مصاب

" ان عظم الجزاء من عظم البلاء ، وان الله اذا احب قوما ابتلاهم
فمن رضى فله الرضا ، ومن سخط فله السخط "

والحمد لله اكيد انت شوفت بعينك بانه مع العسر يسر
واكيد الحمد لله الوقتى ربنا بدل الحال وعوضك عن كل اللى فات
شوف بقى ياابو محمد
احكيلنا بقى عن شغلك حاليا ،، بتقضى يومك ازاى بالظبط فى شغلك
وايه رايك فى مشروع تجارة مواد غذائية بالجمله
وخاصة فى برمبال والرياض ؟

 

الاخ الجميل والانسان المهذب وعريس المنتدى الاستاذ ابراهيم نعينع

اولا اتوجه لك بكل اسفى على تأخرى عليك فى الرد على سؤالك عن

كيفيه قضاء يومى لان مش ملاحق من اجهزه استخبارات ابو حمزه

كل شويه يباغتنى بسؤال اتعجب من كيفيه وصوله لمعلومات لا يعرفها

الا المقربيين واتمنى ان اجد من يصرفه عنى بس بجد هو حد جميل

بل هو فاكهه المنتدى

اعود معك اخى الكريم لكيف اقضى يومى

فأنا سأبدأ من لحظه خروجى لعملى اولا اعرفك طبيعه عملى

فأنا تاجر جمله توزيع وتوريد ( بيض وجبنه رومى واسطمبولى وفيتا وجبنه تلاجه

وجبنه براميلى وجبنه صفراء ) لدى مخازن بها تلك البضائع واقوم بتوزيعها

على محلات السوبر ماركت واحيانا الفنادق والقرى السياحيه المهم دائما ما يكون

لدى عامل يساعدنى فى تحميل وتنزيل البضاعه للزباين المهم الرحله تبدأ من بعد

صلاه المغرب ولذلك سأبدأ من هنا انا بالطبع لى زباين اقوم يوميا اقوم يوميا

بالمرور عليهم ليأخذوا ما ينقصهم من تلك البضائع وطبعا لايخلو اليو من بعض

المنغصات مثل مثلا ان بعض التجار ممكن يأتى لزبونك ويضرب له الاسعار لكى

يأخذ الزبون منك واسألوا ابو تسنيم كان بيلف على زباينى ويضرب لهم الاسعار

لمصلحه تاجر هو يعمل معه بس على مين انا كنت لا انام الليل لو زبون راح منى

والحمد لله كنت محبوب جدا وكان التاجر اللى ياخد منى زبون ياخده بصعوبه

لانى كنت اجعل العلاقه بينى وبين زباينى علاقه اولا محبه وصداقه قبل الشغل

وده كان سر نجاحى ولا ايه يا ابو تسنيم على فكره ياستاذ ابراهيم لا يغرك

ان ابو تسنيم شكله طيب وحمل وديع لا بالعكس ده قناع متخفى ورائه ياااااااااااااه

ياما تعبنى كتير بس والله انا ادين له بالفضل انه كان من منافسته لى كان

مخلينى دايما مصحصح للزباين وعامله الف حساب على فكره الكلام بجد

المهم اخى الفاضل اظل هكذا فى عملى حتى الثانيه او التالثه صباحا بعدها

اعود للبيت وقبل كل شيئ فى هذه النقطه او الروشته يكمن سر نجاحى

عند دخولى لبيتى عائدا من عملى اقوم بالوضوء واصلى قيام الليل واقرأ

من القرأن سوره يس لان يس لما قرأ له فأقرأها بنيه تيسير الحال بعد

ذلك أقرأ سوره الواقعه لان رسولنا الكريم يقول من قرأ الواقعه فى ليلته

لم تصبه فاقه وكان الرسول يقول عن سوره الواقعه من اراد الغنى ( الثراء )

فيقرأ الواقعه وكان ارسول عليه الصلاه والسلام سوره الغنى بعد ذلك اقرأ

اذكار الصباح والمساء وهى ماروعها لما لها من فوائد فى الحفاظ عليك

وفك الكرب والغم وبعد ذلك اقرأ سوره الجن لتقينى من ضمه القبر وعذابه

وبعد ذلك اقوم بالدعاء لامى عليها رحمه الله ونفسى والمسلمين اجمعين

بعد ذلك اقوم بترتيب ماحصلت عليه من اموال واظبطهم واعدهم

بعد ذلك انتظر صلاه الفجر وانام واصحو مع اذان الظهر لاصلى وانتظر

لو احد من زباينى اتصل على عاوز بضاعه احملها وارسلها له لو مفيش

اجلس فى بيتى وسط ابنائى وطبعا اليوم لايخلو من الذهاب للبحر وطبعا

ده مش على طول حتى يأتى المغرب ونعود لنفس الوتيره مره اخرى وهكذا

اما عن سؤالك اخى الحبيب عن تجاره الجمله فى البلد

فهو مشروع اكثر من رائع واخبى عليك سرا انى عملت له دراسه وسألت ممن

عملوا فى هذا المجال وجدتهم يثنون عليه ولكن طبعا ده لازم تبدأ قوى حتى

تكون قويا والا يقتصر ذلك على البلد ولكن ممكن كل بلده من حوالينا لها يوم

اذهب اليه واكون شغال بالتليفون يعنى تكون مثلا رايح النهارده البجلات وعارف

ان البضاعه اللى معاك هياخدها فلان وفلان ودى قمه النجاح وانا اشجعك بس

لازم تبدأ قوى واظن ان من امثالك يدرك كيف ينجح لانك مثل يجب الاقتداء به

اخى الكريم اتمنى ان اكون قد وفقنى الله وفى انتظار ملحوظاتك واسئلتك

 

 

احم
السلام عليكم

(شوف الزبون اللى بره ده ياد ياعوض)
اخبارك يا عم نهاد

دلوقتى انت حكيت عن الحوادث اللى انت عملتها بالعربيه ومنهم الحادثه اللى خلتك تفضل سنه فى البلد
طيب فى الحادثه دى كانت اكبر اصابه فى دراعك وكنت مجبس دراعك وطبعا شغال بدراعك التانى بس
هههههههههههههههههههههه
طيب
وفى الايام دى كنت كل يوم بتروح عند حسنى طاهر الدكان وطبعا ايد متجبسه وايد بتاكل لب
واللب ده ببلاش طبعا صح
ههههههههههههه
المهم
عايزك تفتكرلنا موقف ليك مع حسنى عمرك ما تنساه
وبالمره يا اخى تحاسبه على اللب
هههههههههههههههه
(واد ياعوض ..........رحت فين ياد)
معلهش اسيبك دلوقتى اصل الواد عوض شكله زوغ

سلام عليكم

 

نهاد سليم كتب:

اخوتى الاحباء سألنى الاخ الحبيب ابو حمزه

وتتهشم السياره الجديده اللى لم افرح بها بعد وبدأت فى اصلاحها ولكنها لم تعود كما كانت المهم اتصلحت


السياره قد تحطمت وبدأت فى اصلاحها فى الغردقه

قال عربيتك مقلوبه فى البحر الجديد عند كفر علام جريت فى الشوارع

 

ابوحمزه الجمل كتب:

احم
السلام عليكم

(شوف الزبون اللى بره ده ياد ياعوض)
اخبارك يا عم نهاد

دلوقتى انت حكيت عن الحوادث اللى انت عملتها بالعربيه ومنهم الحادثه اللى خلتك تفضل سنه فى البلد
طيب فى الحادثه دى كانت اكبر اصابه فى دراعك وكنت مجبس دراعك وطبعا شغال بدراعك التانى بس
هههههههههههههههههههههه
طيب
وفى الايام دى كنت كل يوم بتروح عند حسنى طاهر الدكان وطبعا ايد متجبسه وايد بتاكل لب
واللب ده ببلاش طبعا صح
ههههههههههههه
المهم
عايزك تفتكرلنا موقف ليك مع حسنى عمرك ما تنساه
وبالمره يا اخى تحاسبه على اللب
هههههههههههههههه
(واد ياعوض ..........رحت فين ياد)
معلهش اسيبك دلوقتى اصل الواد عوض شكله زوغ

سلام عليكم

 

ابو حمزه انت حضرت تانى وبعدين براحه شويه وبعدين انت

تنفع تكون عضو اساسى فى الجهاز الجديد ( الامن الوطنى )

عموما اولا اجاوبك عن الجائزه اللى اخدتها من التليفزيون وذلك

على الهواء مباشره

كنت فى يوم سنه 2004 فى البلد اقضى اجازه عيد الاضحى المبارك

وداخل شقتى وبفتح التليفزيون وجد المذيعه حياه عبدون تسأل سؤال

عبر برنامجها مونديال النجوم وهو عباره عن لقطه من مباراه كره قدم

وتسأل حياه عبدون عن المباراه كانت بين مين ومين وانتهت كام وكانت

فين وبمناسبه ايه ومين اللى احرز الاهداف وكنت عارف المباراه واول

مره فى حياتى اتصل ببرنامج واتصلت ورد على احد الموظفين وحولنى

على الهواء وسالتنى حياه عبدون طبعا بعد ما اتعرفت على قلت المباراه

كانت بين البرازيل والسويد وانتهت 2/1 لصلح البرازيل وكانت سنه

1990 فى ايطاليا فى كأس العالم واحرز اهداف البرازيل روماريو وبيبيتو

وهنا اعلنت المذيعه حياه عبدون عن فوزى بقيمه الجائزه وقدرها 1000ج

وعلى الحضور يوم الاربعاء القادم ميعاد البرنامج لاستلام قيمه الجائزه طبعا

البلد كلها عرفت عن طريق التليفزيون وبدأت اعد العده وجبت عربيه 2 كابينه

ايجار 150 ج وكان معايا فى تلك الرحله اصدقاء عمرى احمد حسن ومحمد هاشم

ووصلنا مبنى ماسبيرو وسألت فى العلاقات العامه ووجدت اسمى مكتوب وعلى

الطلوع للاستوديو وطبعا احمد حسن ومحمد هاشم طلع نأبهم على شونه كانوا

فاكريين انهم هيطلعوا معايا ولكن الامن رفض واتفرجوا على البرنامج على مقهى

المهم جاء المخرج واخدنى وطلعنا وجلست فى غرفه الاخراج وشفت يابنى اللى

بيحصل فى الكواليس المذيعه وهى تصفف شعرها وتعمل المكياج والمذيع الفلانى

يدخن سيجاره فى الفاصل وفجأه حدث مالا يحمد عقباه تكهرب الجو ووجدت

المذيعه حياه عبدون تصرخ وتسب فى العاملين وتأخذ شنطتها وتمشى هنا وقع

قلبى فى رجليه وقلت فى نفسى جه الحزين يفرح ملقاش مطرح البرنامج باين

عليه انفض ووجدت المخرج ايمن السيد يتصل بحياه عبدون قلت الحمد لله ولكن

وجدت المخرج يصرخ فيها مش هقبل منك الاسلوب القذر ده يا حياه وشويه

وجدتها تدخل الاستوديو وتصرخ فى العمال انتم مش هتخلونى اخلف تانى

المهم وجدت المخرج يهمس فى اذن احد مساعديه وقاله انت فهمته هيعمل ايه

جائنى المساعد وقال حياه هتنادى عليك وتعطيك ظرف فيه 1000ج هناخد منك

100ج ضرايب وتمضى وخلاص كده طبعا نادت على المذيعه وكلمتنى وسألتنى

عن شعورى وكام سؤال كده المهم اعطتنى الظرف وذهبت للمخرج ومضونى

على انى استلمت 1000ج وليس 900ج كما قالوا قال لى عد الفلوس رفضت

من باب الذوق ونزلت ورحت لاصدقائى وعديت الفلوس وهنا المفاجأه 850ج

طبعا اصدقائى لم يتركونى غير بعشوه كباب يعنى الموضوع بعد المصاريف

صفى على 500ج خلى بالك التقيل جاى ورا اقسم بالله عشت ايام بعدها صعبه

جدا الناس لم تتركنى فى حالى اللى يقول الفلاح يفضل 6 شهور يعزق فى

الغيط لا يوف 1000ج وده مسافه تليفون جاب 1000ج حتى جاء اليوم الموعود

وانا ذاهب لدكتور اسنان وركبت المواصلات وجلست ووجدت امرأه تركب من

كفر علام قمت واجلستها ووقفت فى الزحام ونزلت للدكتور وبضع ايدى فى جيبى

ولم اجد الفلوس وكانوا من 900ج الفلوس اتسرقت من جيبى فى المواصلات

وكانت سرقتها رحمه من الله وعرفت كل من يقابلنى حتى تتركنى الناس فى حالى

ماشى ياعم ابو حمزه يعنى الجايزه دفعت عليها من جيبى طبعا مبسوووووط