قضية للمناقشة
هل سألت نفسك يوما لماذا يتزوج شباب البلد من خارجها ؟ وهل عرفت السبب ؟ يقولون إذا عرف السبب بطل العجب !! هذا رأيته فى أسرتى ، ويتكرر حاليا بصورة تثير التساؤل ، فهل سألنا أنفسنا لماذا زادت هذه الظاهرة ؟
هل هى المغالاة فى المهور ؟ أم فى لوازم الفرح والفشخرة والمنظرة ؟ هل هى العدوى التى تسرى بين عائلات القرية عندما يقلدون بعضهم البعض ؟ ماذا يفعل الفقير الذى عنده أكثر من بنت ؟ وماذا يفعل أبو البنات ؟ هل كتب عليه أن يعشن  بناته بلا زواج ويعيش بحسرتهن ؟
أتذكر أننى عندما تزوجت من زميلتى تقاسمنا كل شيئ فلماذا لايحدث ذلك فى البلد؟
لماذا مثلا أربعين فوطة وش وأربعون فوطة إيدين وأربعين بشكير ومن كل حاجة إثنين ؟ مع أن الموضة تتغير وكل شيئ الى الأحسن !! ولقد زاد الطين بلًه أخير عندما علمت بإضافة تكييف وشاشة lcd
أتذكر أنه فى يوم ما كانت تعد الخيام فى حالات الوفاة وفرحت جدا عندما تم الغائها ، وفرحت أكثر لما عرفت بوجود أماكن للعزاء فى المساجد الجديدة علشان ميبقاش موت وخراب ديار ، وفرحت أيضا لتلقى العزاء على المدافن وكفى 
المهم هل نفكر فى حل سريع لهذه القضية فبنات البلدين كثيرات والشباب يطيرون للبلاد المجاورة  لأنهم لا يغالون ويريدون ستر بناتهن !! الحل فى أيديكم يا شباب اليوم . فهيا بنا نبدأ فأول الطريق يبدأ بخطوة

 

الاستاذ سيد داود
هذا الموضوع يعتبر معقد لان القياده فيه ليست بيد شخص بعينه
او انها تحل فى يوم وليله
بل انها تحتاج الى (معجزة ) هذا فى رايى انا حيث ان هذه المناقشه قد اثيرت من قبل
وقد حاول قدبما الاخوان حلها وتم الاتفاق على التخفيف مما يرسل بعد الزفاف
واتفقوا خلاص واذ بنا نفاجأ بأن كل ما يريدوه تم باعطاء كل شىء الى اهل العريس
امتى بقى ) بالليل ؟؟؟؟؟ هذا يعنى ان المشكله فى الاشخاص ذاتهم
وبعدين كل واحد عايز بنته او ابنه يبقى عنده اكتر من فلان ولازم يعمل الزفاف
فى القاعه الفلانيه اهو ان يعنى بنت فلان احسن من بنتى
واللى انا لاحظته فى الاونه الاخيرة ان الناس الغلابه بتودى اكتر من العادى
ولكن اللى بيتظلم فى الحاجه دى هو متوسطى الحال
المشكله دى كبيره اوى وعلى فكرة
كمان انا بشوف ان الاولاد او الشباب بيتجوز من بره من اجل ان البلد الفلانيه
بتودى اكتر احيانا من عندنا او انها بتساعد فى الجهاز اكتر من تقاليد بلدنا

كمان كل حاجه اصبح بيروح منها 2
2غساله    2 تلاجه    كمبيوتر   واجهزة ملهاش نهايه والميكروويف
يعنى حاجه بصراحه والله خراب بيوت الاهالى
وتجهيز منزل يجهز 3 بيوت من كافة ما يلزم وليس منزل واحدا
ربنا يكون فى عون الاباء والامهات ويعينهم على التربيه ثم الزواج

 

ست الستات أم شروق ..
أعرف أن هذا الموضوع شائك جدا .. وأعرف
أن هناك محاولات بذلت ، لكن لو بدأ خطباء المساجد
وعقلاء البلد والستات قبل الرجال لوجدنا نتيجة حتمية
والله لو بدأ واحد فى البلد وسبح ضد التيار لقلده
باقى الناس ، أعرف أن الستات هم الذين يحكمون
البيوت الآن بصفتها   وزيرة المالية وفى إعتقادى الشخصى أن
البداية منكن أيتها السيدات والله الموفق وكما قلت أول الطريق
يبدأ بخطوة . شكرا على مرورك وتحياتى

 

دا كان فيه ناس كمان بتودي ( عجل ) بكسر العين . مع العزال 


ربنا يعيين اللي عنده بنات كتير علي العادات والتقاليد السيئة المنتشرة في برمبال القديمة 



اللهم احمي مصر من الفتن 


خالص تحياتي للطرح المتميز والهام

 

بصراحه يا استاذ سيد هيه مشكله عويصه
وكان لازم تتحل من زمان من شيوخ والعقلاء والعمده وكان لازم يعملوا اتفاق معين على البلدين والا يخل بيه يدفع غرامه
انما الوقتى مفيش حد حيقدر بالذات على الستات الكبار الا تقول بنت عمها جايبه كذا لازم بنتى تبقى احسن
لازم بنتى متقلش عن احد وما بتراعيش ظروف جوزها اهم حاجه الفشخره الكدابه يعنى انا مثلا ابويا عنده 6 بنات الحمد لله كلنا اتجوزنا لسه الاخيره
بس السنه الا فاتت كان فرح اختى وكنت نزله من السعوديه صعقت من الحاجات الا جيباها حسيت انى متجوزه من ايام الفراعنه
يعنى طقم شربات 6 كوبيات 350 تقول لازم يجى ويكونوا 2 قولتلها ليه يعنى بيعمل العصير لوحده قالت كل البنات بقت تجيبه
قولتلها الحمد لله انى اجوزت بدل ما كنت اجيبه واموت جبه
وكمان اغلب شباب البلد بيسيبوا بنات البلد القمرات ويروحوا يتجوزا بره المفروض كل واحد اولى ببنات بلده او عيلته اوالشارع الا فيه
بس المشكله فى بلدنا الواحد يروح يخطب واحده طبعا بيروح يسال الجيران  وطبعا اغلب الجيران مبيحبوش بعض فتقول كلام وحش على البنت وتظلمها وهو يصدق ودى حاجه تخليهم يخطبوا من بره
بس انا بقول لكل شاب عايز تخطب واحده اهم حاجه عيلتها واخلاقها مش مهم الجيران ولا العفش اهم حاجه الهناوه ياما ناس مكلفه شقق باللالف وتعيسه
وناس عايشه على اد حالها وسعيده مش مهم الشقق

مثال

كان فى بنت فى شارعنا ظروفها على اد حالها واتخطبت لواحد بدبله وخاتم سنتين وراضيه ومبسوطه ويوم كتب الكتاب حماتها تصصم يااما يدفعوا 5000 للصبحيه الوقتى يامفيش جواز ابوها بقى يروح يا عينى يستلف من هنا وهنا
لحد مالم المبلغ وكتبوا الكتاب بالذمه موش عيب

 

من الصعب جدا وجود حل لهذه المشكله وسيظل الوضع علي ماهو عليه بل سيتطور الأمر لأكثر من ذلك 

 

الأخوات أم شروق والتائبة
الإخوة السيد داود وأبوحمزة
يعنى مفيش فايده !! الأمل دائما موجود حتى لو كان ضعيفا
وها أنتم عرفتم سبب هروب عرسان البلد لخارجها ، وهذا خسارة
كبيرة لإقتصاد البلد وجيناتها الأصلية ، وخسارة أن تبور بناتنا
وتفوز برجالنا بنات البلاد المجاورة ، أنا أرى أنه فى المستقبل القريب
سنجد من يثور على هذه التقاليد البالية ، الموضة تتغير وكذلك الناس يتغيرون
قلبى مع كل أم وكل أب عنده من البنات سته كا الأخت التائبة ، وربنا يمد فى عمرنا لنرى
كيف أن هناك عاقلات فى بلدنا يثرن ، وجيل جديد يثور ، والله لو كنت فى البلد ولى بنت بها
ما فعلت ذلك وإللى عايز يتجوزها أهلا ومن يشترط فلا أهلا ولا سهلا وهنا تكون البداية
وكما قلت سابقا .. زمان كان فض غشاء البكارة يوم الفرح فضيحة بكل المقاييس
هل هذا يحدث حاليا ؟ لعله حدث تغييرا فى المفاهيم وأتذكر أن أخى سيد أحمد داود
هو أول من رفض وطرد المنتظرين تحت الشباك وأمام الغرفة ، طردهم شر طردة
وكان بعد ذلك التقليد ، أين المتعلمون والمثقفون والعاقلون فى البلد ؟
ربنا معاكم وما زلت مصر وعندى أمل والله الموفق .. مع تحياتى ..  سيد داود

 

 

شكرا ليكوا بس لاستاذالترس اهلاوى بنات بلدك اولى انك تسترهم
ولا تسيبونا نجوز فى بلاد تانيه غريبه يفضلوا يطلعوا فى عينا لان احنا بعيد عن اهلنا
انما لوجبهم حنروح نشتكى ونفضفض انما فى البلد الغريبه ادينا عايشين
فالاولى بنات عيلتك ولو اجوزوا خليكى فى بنات الحاره والجيران

 

أول من عمل هذه العملة معاليك ولا ايه

 

العبره مش العروسة منين

العبره فى تكاليف الزواج

الرسول الكريم قال : مَن استطاع منكم الباءة فليتزوج ، يعنى اللى يقدر ماديا و جسديا و عقليا 

و القدرة هنا حدودها قدرة الكفاف ، يعنى عيشة مستورة و تقضى الحاجات الاساسية للافراد دون اسراف

الرسول الكريم كمان اتزوج أمنا ماريه القبطية و كانت من مصر ، و دا لأهداف معلومة طبعا

اذا و من وجهة نظرى أن العبرة فيما سنفعل لنتزوج و ليس بمَن سنتزوج

محمد الشرقاوى

 

الأخوات والإخوة فى برمبال والرياض ..
  دائما يقولون .. إطرق الحديد وهو ساخن
ودائما يقولون أول الطريق يبدأ بخطوة
أنا سعيد أنكم تتفاعلون وتتعصبون وقد تتخانقون
لكن . الخلاف فى الرأى لا يفسد للود قضية
لا تسكتوا .. ثوروا تكلموا صيحوا بس نوصل لنتيجة
أنا لست مستفيدا من حل القضية ولكنى سأكون سعيدا
من أجل شباب بلدى وبناته ، فكل البلد قرايبى
ولأننى شربت من عكارة النيل زمان ولعبت على تراب
بلدى فأنا مهتم .. أرجو لكم التوفيق ولا تهنوا ولا تيئسوا
والله معكم

 

سيدي الفاضل .....

إحدي القري في الصعيد اجتمع كبراؤها

خصيصا لهذا الغرض في عام 2008

واتخذوا قرارا بألا تزيد تكاليف الزواج

لمتوسطي الحال عن خمسة آلاف جنيه

ولميسوري الحال عن عشرة آلاف جنيه

أي أن تقتصر التجهيزات علي الضروريات

سرير وبوتاجاز والأدوات الضرورية للمطبخ

حل عملي وبسيط ويقضي علي الإسراف والمباهاة الفارغة

ربما يجب أن نضعه نصب أعيننا

مع العلم أن هؤلاء الكبراء اتخذوا قرارا آخر

بمعاقبة وتغريم كل من يخالف هذا القرار .

 

الحل من وجهة نظري هو اعفاء العروس من أي تكاليف أو المشاركه في النفقات وبذلك سيشتري العريس ما يستطيع أن يشتريه فقط وسيبحث عن العروس المناسبه لامكانياته وساعتها والد العروس ووالدتها لن يشترطوا علي العريس أن يشتري كذا وكذا لأنهم لم يدفعوا شئ حتي يشترطوا عليه وفي حال الاشتراط والتشدد فالبنات كتير 

 

الأخ أبو حمزه ..
هو إقتراح إسلامى معتبر فالزوج فى الإسلام مطلوب منه
التجهيز بل ويعطى مهر كمان ومكافأة للأب
لأنه علمها له ورباها وإذا فعل والد العروس شيئا فهو من كرمه
وهذا يحدث فى السعودية وهتاك حكاية طريفة عايشتها وأنا فى جدة من زمن ..
أعطى العريس لوالد العروس مائة ألف ريال هديه منه . غير أن العروس قبل
كتب الكتاب هربت من الباب الخلفى للقاعة بواسطة شقيقها الذى
كان يعرف أن والدها قد باعها بهذا المبلغ ، ولما عرف العريس
طالبه بالمائة ألف ريال لكنها كانت قد فص ملح وداب وسيدفعها حين ميسرة
ممكن العروس تجيب أدوات المطبخ وممكن كل هذه الإقتراحات توضع
على طاولة البحث عند إجتماع العقلاء كما حدث فى الصعيد وشكرا

 

فكرة التراس أهلاوى محترم بس هو يسأل فين الرجال المحترمين ؟
والله كتير !! وفى إعتقادى أن الكرة فى ملعب الستات
هم وحدهم القادرين على حل هذه المشكلة فهم السبب 
والمثل يقول اللى حضًر العفريت يصرفه !! فما رأيكم
دام فضلكم ؟

 

استاذي الفاضل اشكر حضرتك لفتح بابا التحدث في هذا الموضوع المعقد 
اظن من رئي ان السبب الرئيسي في هذه المشكله هم الستات ازاى بنتى
مجبلهاش زى بنت فلانه وفلانه
ولو جت مرات ابنها تسود عشتها بسبب جهازاها لو ناقص ابره او ان
الاجهزة الكهربئيه دون المستوى اتذكر ان الحاج فتح الله الله يرحمه
ياما اتكلم في هذا الموضوع دون جدوا اللهم استر بنات المسلمين

 

هه
ابو

أبو كريم كتب:

سيدي الفاضل .....

إحدي القري في الصعيد اجتمع كبراؤها

خصيصا لهذا الغرض في عام 2008

واتخذوا قرارا بألا تزيد تكاليف الزواج

لمتوسطي الحال عن خمسة آلاف جنيه

ولميسوري الحال عن عشرة آلاف جنيه

أي أن تقتصر التجهيزات علي الضروريات

سرير وبوتاجاز والأدوات الضرورية للمطبخ

حل عملي وبسيط ويقضي علي الإسراف والمباهاة الفارغة

ربما يجب أن نضعه نصب أعيننا

مع العلم أن هؤلاء الكبراء اتخذوا قرارا آخر

بمعاقبة وتغريم كل من يخالف هذا القرار .

ابو كريم الجهاز في الصعيد عبارة عن طقم سرير وطقم شاى لان العروسه بتعيش مع العيله
ده الى شاهدته في اسيوط بعينى

 

يبقا 

ابوحمزه كتب:

الحل من وجهة نظري هو اعفاء العروس من أي تكاليف أو المشاركه في النفقات وبذلك سيشتري العريس ما يستطيع أن يشتريه فقط وسيبحث عن العروس المناسبه لامكانياته وساعتها والد العروس ووالدتها لن يشترطوا علي العريس أن يشتري كذا وكذا لأنهم لم يدفعوا شئ حتي يشترطوا عليه وفي حال الاشتراط والتشدد فالبنات كتير 

يبقا ام العروسه وابوها هيطلقو هتقولو هتفضحنا في البلد ياراجل سورى في اللفظ

 

ملاك بلا أجنحة
أبو حمزة
الحل فى رأيى المتواضع وقبل أن يشارف النقاش
على الإنتهاء هو فى الجيل الجديد من الأمهات
وبناتهن وربنا يوفق الجميع .. العملية عايزة
إرادة جامدة زى بالضبط الإمتناع عن التدخين
والله الموفق لما فيه خير بلدنا

 

امين يارب

سيدداود كتب:

ملاك بلا أجنحة
أبو حمزة
الحل فى رأيى المتواضع وقبل أن يشارف النقاش
على الإنتهاء هو فى الجيل الجديد من الأمهات
وبناتهن وربنا يوفق الجميع .. العملية عايزة
إرادة جامدة زى بالضبط الإمتناع عن التدخين
والله الموفق لما فيه خير بلدنا

 

ملاك بلا أجنحة  .. وكل الملايكة من الحريم وهم كثر فى بلدى
الكرة فى ملعبكم .. الحكاية عايزة وقت والوقت فى صفكم
وربنا معاكم أنا لو موجود بينكم كنت عملت حاجة فأنا عشت فى البلد رغم
صغر سنى كبيرا فى أفكارى ، كنا نكنس حارات الصوابر كلها
يوميا كل مجموعة تنتشر فى شارع ، نحن لا نكنس بل أهلنا من
السكان الذين يجاملونا ويكنسون ويرشون الشوارع بالمياه
وكنا نختار أحسن شارع ونعلنه للناس للتحفيز . ربنا معاكم فى هذه
المشكلة التى أراها عويصة  لكن لازم تتحل !! البركة فيكم .

 

 

عزيزى نهاد القاسم
شكرا على طرحك الجيد .. وشكرا على ثقتك فى
وشكرا على طلبك ولقد ضحكت كثيرا من حكاية التكتك دى
ناقص يجيبوا العيال يوم الصباحية ، ولقد قال لى
إبن أخى أن هناك جاموسة كمان وشاشة ال سى دى
وتكييف .. يا حلاوة عروسة مكيفة أو عريس كييف
والله الذى لا اله إلا هو دا تهريج !! بس  واحد راجل ابن راجل
يعملها ويقايس وكله حيقلده .. معا نغير هذا التقاليد البالية
ومعا نحطم الأفكار المفلسة وبالتوفيق وحمد الله على سلامتك