تذكير بمساهمة فاتح الموضوع :

اخواني أعضاء منتدي شباب برمبال القديمة والرياض
هنا سنقوم بعمل قاموس للالفاظ القديمة الدارجه مع التعريف بمعناها الحقيقي في اللغة العربيه وذلك لأن هناك الكثير من هذه الكلمات لم يعد يستخدمه احد الآن وحفاظا علي هذه الكلمات من الاندثار سنقوم بتجميعها هنا لأنها أيضا جزء من تاريخنا ومن هنا أود أن أتوجه بالشكر للأستاذ علي حسن داوود صاحب الفكره الاصليه منذ أكثر من خمسة عشر عاما والتي لم تري النور الا الآن لذلك نتمني أن يكون معنا في هذا العمل وتكونوا كلكم معنا ليخرج هذا القاموس الي النور باذن الله وياحبذا لو أدخلنا اللفظ في جملة حتي يكون سهل للجميع فهمه ساضرب مثالا
انهارده عندنا تصبين
بمعني أن اليوم سنقوم بغسيل الملابس

حامد علي خلف جنيدي

 

هههههه طيب اخي ابو حمزة ازاي اتودك واتنحرش علشان انا كمان عاوزة افهم

 

 

الظاهر كده ان انتم حالات مستعصيه وحتتعبونى معاكم انتم الجوز
طيب مش تعملو حسابكم وتجيبو مترجم معاكم
على العموم محلوله حمزه ابنى فى البلد روحوله وابقو قابلونى لو عرفتو تفهمو منه حاجه دا انا محتاج مترجم عشان افهمه
فى واحد فى الدنيا اسمه حمزه الجمل يقول انا اسمى حزه الجيم
انا حاسس انه بيتاجر باسمه وداخل بباقى الحروف فى البورصه ومعاه خميره دلوقتى تحت البلاطه

 

 

ابوحمزه الجمل كتب:

الظاهر كده ان انتم حالات مستعصيه وحتتعبونى معاكم انتم الجوز
طيب مش تعملو حسابكم وتجيبو مترجم معاكم
على العموم محلوله حمزه ابنى فى البلد روحوله وابقو قابلونى لو عرفتو تفهمو منه حاجه دا انا محتاج مترجم عشان افهمه
فى واحد فى الدنيا اسمه حمزه الجمل يقول انا اسمى حزه الجيم
انا حاسس انه بيتاجر باسمه وداخل بباقى الحروف فى البورصه ومعاه خميره دلوقتى تحت البلاطه

هههه ممكن أخد درس عنده؟

ربنا يخليهولك ويبارك فيه ياااارب

 

عواف عليكم معلش انا غايب عنكم كام يوم كده اللى هما بتوع السفر 0 حكم انا كت فى بلاد بره وجيت وازيك كده يا استاذ على حسن -عامل ايه يا نن عينى انت كويس

 

حد الله بحدود

والله وكيل
الكلمات دى ماسمعتهاش من زمان

كان معظم خط المنصورة بيقول الكلمات دى

يا سنه سوخه يا جدعاااان ههههههه

بجد موضوع جميل
تسلم يا حمزة

 

موضوع زي العسل
و النعمة انا أول مرة أسمع الكلام ديه
بس ما علينا ع العموم
متشكرين يا أبو حمزة ألف شكر
أفتكم بعافية بجى
ههههههههههههههههههههههههههههههههههه

 

العواف ياحمزة للغة بلدنا دى فضحانه فى كل مكان نفسى انساه يا حايلى

 

كل واحد يسىء الى بلدنا يجيله داء الشلل يشله او سل يسله

 

عمى جاء من الحج وجاى فحل وحلو

 

هههههههههههههههههههههههههههه

 

كلتكم بتتحدوا عالفاضى والمليانه.. كله واحد يراعى لنفسه ويسك حنكه اول ما يدخل من باب الدار يصوب ويسكه وراه ويقعد فى اى بنيئة .. جتك غته منك له ياصبى......

واللا ايه يا ابوداوود........... الموضوع جايلك على الطبطاب

طارق ابن ابو مامون

 

هتدلى البلد امتى يا صبى

أصل أنى كت عاوز أشوفك ياله

جاك غته انت من زمان الزمن فى بلاد بره

ولما تيجى هتلاقى الخارج اتسهدم

يا جدع دا حتى سكة صعب اتغيرت

والعيال معدتش بتلعب جواعير فى الخراب

والتيرو معدش موجود فى الشوارع

فى الاجازه رحت الغيط ملأتش الغبيط ولا الشؤدف

والنزاز كان مسدود والساقى فيه عفش والدنيا بايظه

وسألت عمك الحاج على السجر الى كنت زارعه

والحشيش الى كان عالجسر والبأشفت الى طلعناه من الزاروق

آل لى حدفناه فى المشروع

روحت الدار ووأفت فى الشكمه لقيت المنضره فيها ناس

والمأعد فيه ضيوف

أولت أروح أكوع شويه حلمت يا سيدى يا الى ما انت

انى روحت البر التانى ( الرياض )

وقابلت ستى الى ماتت من زمان يا دنيا

وقلت لها العافيه عليك

آلت عافيتين يلبسو بدنك يا حيلى



كفايه كدا ولا كمان

ههههههههههههههه

فكرتنى بأيام زمان الحلوه

شكرا أبو حمزه

 

كنت بكتب المشاركه وانت بتكتبها والله يا طارق

القلوب عند بعضها يا صبى

بس ابقى قابلنى على سكة صعب

او اطلعلى عالبحر الجديد

وهنشوف مين الفتك

ههههههههههههههه

 

حبيى يا ابو داوود ......... واحشنى يا حدق.. اوعى تنسى تعافى لى عاللى حداك.. كلتهم بالنفر

وعى راى المثل........ اكفى القدرة على فمها.... يطلع الواد لابوه

ويجعله عامر

الواد ابن ابو مأمون ابو لسان زالف

 

هو فى ايه ياجماعة المعزة هتعلم امها الرعية

اوعى تيجى فى حارة العرج وتعرج

ادى العيش لخبازة ولو اكل نصفه

بقول ليكوايه انا اشم ريحة ايدى اشبع منها

وكفاية عليكوا كده انهرده

 

بين عليك فلاح أراري ... وعاوزك بكره تزاملني في حش الربة

 

بأولكم أيه ياجماعة متيجم تعدوا معايه شويه في الشكمه بتاعتنه ونشرب شاي وحنا أعدين علي الكرويته بتاعتنه

وكنا زمان بنعالج الجروح إزاي
نحط عليها حته طينة من الترعة ونربطها
نحط عليها شويته زيت كهربا
نعمل عجينه دقيق بسكر ونليس عليها
ندهن سبرتو
كانو يغسلوا الرجل بمية وملح وبعدين النفر يدوس في شخاخ البهيمة
نمسح ندي الصبحية من علي الزرع وندهن بيه

 

بؤلك ايه يا ابو ادهم

عندنا بكره تشأيع متيجى تزاملنى

هننابل شوية رز ونشتلهم فى الحتت الفاضيه

ولو مجيتش أبوك الحاج هيجيبلك الانبه وكمان الفرئله

عشان اصلا هو مستنى البهايم الى هتلوط

باين الراجل نسي الناف واللوح فجاب الباجور

وكمان ام كتينه

ولف الجسور وربط الانايه

وبدر الرز بس كان مليان دنيبه وأوريطه وعجير وسعد

يعنى الزرعه باظت الى اصلا واخدها مرابعه

بس كان حاطط جوبيه فى الخارج وكمان فوليار

وحابو شوية مع وزعايك وصير وشلميز ( نوع سمك شكل الاراميط ) وفلافيس

يلا أهو نتعشى ونتفاول كمان

ونودى للرجاله الى عند الأمينه بيإيدو برماريم الحطب والسجر

ويعدين اروح احش بردعة ربه واحمل عالحماره خلفين واربطها بالعجرونه

واعلف البهايم واخرط الدريس

وبعدين اروح اتشرب بحتة حدأه وفحل بصل واورصتين وعود جلوين

واقوم أنأى الرز .

ههههههههههههههههههههههههههههههههه

ايه رأيك فى الفلاحه ؟

 

هور هورا ايه يا أستاذ يا متعلم يا متنور يا بتاع بلاد بره هو منين بتؤول للراجل تعالي نشتل الرز وتؤوله ابوك الحاج مستني البهايم تلوط لهوه انت بتشتل أبل متزرع عشنا وشوفنا يا ولاد

 

ما شاء يا بو داود

انت قاموس ... كانت ايام حلوة والله .. يا ريتها ترجع من تاني

ونضرب توب ونرص الأمينة ونجبلك شوية شر ونشويهم ونعزمك عل الغده

وعلشان انت غالي علينا حطبخلك الرز علي الموئدة بس احدفلي قرصين حلاوة من علي السطح علشان نأييد بهم علي الرز



للحديث بقية

 

الله يحظك يابو داوود.. يخرب دارك.. انت فالح قوى.. جبت لنا الناس بتوع بلاد بره يحدتونا على محدتك اللى مش ولا بد.. وملوش طعم

حتى الافندى اللى قاعد فى البلاد البعيد دهيه اسمها .. قول معايا جك خابط ..البلاد اللى بيرعوا القطط والكلاب عالجسور عشان يتقوتوابها

ايوه الصين.. الافندى المتعلم الفاهم اللى معاه التوجيهيه.. يوه اصدى البكالوريا
حامد بيه افندى جنيدى.. اللى ساكن عالمطلع اللى فريح ابو النصيف عارفه
عارفه يا سى حامد يا بو خلف.. ويجعله عامر

جتكم غته كلتكم...... بلا هده....... وانا معاكو

الواد ابن ابو مامون.. بتاع المستفشى اللى فيها الحكما اللى بيغلى الحقنة قبل ما يضربها فى خربة العيان

طبعا هتقولو عيب المحدت ده اهى جت كده وخلاص

انا ماشى....... العواف غليكم او فتكم بالعافية

 

ياد يا حامد احنا بس بنلم الالفاظ الفلاحى مش بالترتيب يعنى

المهم عندنا حادئ كبر لو عاوز طوبصيه ندرفهالك مع اى حد معديلكم

امبار ح ياخويه ابصر ايه وانا ماشى بمشط على التربيعه بتاعتنا

لقيت المسأه فيها عفش نزلت اجردها لقيت شوليح عورنى

قلت ياد النيله دى ظهره ايه الظهره دى

بس قلت زى بعضك ما يجراش ياله خليك ناشف



تتمسى بخير ياد يا طارق وحشنى والله , لما اتلأى فيك ان شاء الله حخدك ونروح جرن الميهى ونعمل

فرقتين ونضاربكم , ونروح نعدى البحر الجديد وننط من على الكوبري او من عالبغله , والى يغلب

هياكل ظلطه من عمك شعبان او حتى نشتريله ظكطه من ابو عثمان .



العافيه يا ابو ادهم , على فكره مليش فى الفلاحه كتير بس حبى للبلد والناس و الاراضى الزراعيه وانا صغير كنت متواجد دايما عند الارض . فهذه بلدنا ومن فات قديمه تاه .

 

ايه رأيكم نعمل قاموس لكل المناسبات كل مناسبه على حده

الفاظ الافراح

الفاظ الاحزان

الفاظ الدهشه

الفاظ التجاره

الفاظ الملاعب

الفاظ الغيطان

الفاظ العزب

الفاظ الخناقات

وغيره .....

وهكذا .... ويقوم المشرفون بالمنتدى بجمعها وتنظيمها وتكون ثابته لاجيالنا القادمه ....