كثيرا ما حفلت شوارع برمبال القديمه بزخم كبير من الالعاب الشعبيه.منها على ما اتذكر
1-الواحد مليم
2-السبعه
3-الموس
3-الحمار الطويله
4-الطبليه
5-الجواعير
6-الورق
7-الاساتك و.....إلخ
وعلى صعيد اخر كانت هناك المصانع القائمه على المصاطب. وكانت تنتج فى فصل الشتاء(بوابير الطين)وفى فصل الصيف كانت تتنافس على صناعه (العجل ابو كزايز).ولهذه المصانع يرجع الفضل فى القضاء على البطاله .فكنا نجوب الحارات بحثا عن (الكزايز)وخاصه امام المقاهى ومحلات البقاله ونحوه.واتذكر ان احدنا سافر ذات مره لجمع(الكزايز ) من المنصوره.
لذالك نرجو من كباتن الالعاب السابقه .ومن مهندسى هذه المصانع موافاتنا بالمزيد

 

موضوع حلو يا محمد

كنا حنعمل ليه قسم خاص باسم ألعاب برمبالية
بس نسخن معاك علي ما ننشيء القسم
تقدر تقوللي خطوات لعبة الموس

 

ياااااااااااااه يامحمد فكرتنا بالذى مضى
الا ليت الطفولة تعود يوما
انا بقى ياسيبدى كنت محترف لم كزايز
وبعدين بقى كنا بنتفنن فى عمل العجله ام كزايز
ونعملها دركسيون ونعلق عليها بعض الزينه لتبدو رائعه
وبعدين بقى انت لو جيت تشوف احنا كنا بنقضى اليوم ازاى هتستغرب
نصحى من النوم نفطر اى حاجه
ننزل الشارع نبدأها بكرة القدم طبعا اى حاجه وخلاص اصلا مش بنعرف نلعب
وكنا مسمينها الخشة نفضل نقطع فى بعض لغاية لما نتعب وبعد كده نقلبها اصطاد سمك وبعد شويه ممكن نقلبها السبعه ولما نزهق من الكرة بقى نخش على باقى الالعاب الترفيهيه
بداية من واحد مليم ثم الى الطبليه ومنها الى الحماره الطويله
وفى موسم الجواعير انا بتفرج عليهم لانى مكنتش بعرف العب جواعير كانت الكسوه بتسلت منى اما عن الورق والاساتيك فحدث ولا حرج اخوك استاذ
وفى الليل بنجمع كل اطفال الحاره من اولاد وبنات ونلعب استغمايه وكان فى لعبه تانيه كده بتاعة البنات حاجه كده زى بدون كلام
واكيد بتنتهى بالخناق مع البنات وهم يسيبونا ويروحوا يلعبوا لوحدهم
نقوم احنا بقى نقلبها بوليص وحراميه لغاية لما نتعب ونيجى نبص نلاقى اهالينا بتنادى علينا
واروح البيت واخد العالقة المحترمه وبعدها اخش انام وابقى نايم على السرير وبحلم فى العالقه بتاعة بكره هيبقى شكلها ازاى

بجد ولا يوم من ايام الطفولة

 

السلام عليكم
ههههههههههههههههه
حلو الموضوع دا يا حمام..
بالاضافة للالعاب دي انت نسيت اهم لعبة و هي ( القرد و صاحبه )
اللعبة دي انا كنت حريف تزويغ فيها..
هي المفروض واحد بيقعد في الارض علي ( افَزُه ) و دا بيكون ( القرد حفظنا الله ) و ليه واحد ( صاحبه ) المفروض انه بيحميه من ان اي واحد يقرب ليه علشان يديله ( الطريحة هههههههههه ).
و باقي اللاعبين بيجروا حواليه علشان يحاولوا يضربوه .
المفروض اللي هيتمسك هيبقي ( القرد ).
انا بقي كنت احسن واحد لما اتمسك احاول اجري علي بيتنا او استغيث بأي واحد ماشي في الشارع و اقول الحقني يا عم الحاج العيال دول عايزين يضربوني.
ههههههههههههههه كانت ايام.

 

هههههههههه والله موضوع جميل جدا

أنا فاكر إنى لفيت شوارع برمبال القديمه شارع شارع وحاره حاره بسبب الجواعير

 

*يا أستاذ على:نسخن بخطوات الواحد مليم أحسن
طبعا بعد ما سعيد الخظ يتحط فى الارض .والطابور يقف علشان يقفز من فوقه كان القفز له مراحل متتاليه.ونفسك معنا علشان انا ناسى (واحد مليم-خمسه مليم-عشره مليم-خمسه عشر مليم-السكينه -المعلقه- الشوكه-الشلوط-الوقفه----واخر حاجه حرامى هارب فى المدينه)
*يا عم إبراهيم اهم حاجه إنك تاخد العلقه المتينه بالمقشه البلح طبعا . وتغسل رجليك وتنام بتفكر فى علقه بكره.بالمناسبه لى تجربه مع علقه ساخنه .
*اما حضرتك يا كابتتن شرقاوى فكرتنا بالقرد وصحبه .والجرى نص المجدعه .(إلحقنى يا عم الحاج العيال دول عاوزين يضربونى )
*المهندس محمد بالمناسبه اما مكنش لى فى الجواعير كتير. لانى كنت بفر سلاتى بس ,ومعرفش افر عزامى, ولا انشل فى التيرو

 

يا عم محمد نسيت خطوات في الواحد مليم

فين الحكة التقيلة والخفيفة دي من أهم المراحل
وفين عسكري واقف ومتدور وعسكري قاعد ومتدور وعسكري نايم
إيه يا جماعة هتبوظوا الألعاب الأوليمبية البرمبالية
كل سنة وانتم طيبين

 

حلو بجد اسلوب الموضوع محسسنى اننا فى نشره الاخبار مشكور ع الاسلوب والتوبيك

طب الواحد مليم والاساتك والقرد وصاحبه ماشى

انما ايه الطبليه والحمار الطويله والموس والسبعه دى

وفى الليل بنجمع كل اطفال الحاره من اولاد وبنات ونلعب استغمايه وكان فى لعبه تانيه كده بتاعة البنات حاجه كده زى بدون كلام

تقصد لعبه الافلام والمسلسلات اللعبه الوحيده اللى فاكراها كهربه

 

برافو يا استاذ على خلينا نفتكر مع بعض تعرف انا كنت ناسى
.ممكن نعرف من مهندسى المصانع فرده العجل ام كزايز فيها كام كازوزه.
وبالنسبه للعبه المسلسلات والافلام نرجو التوضيح.
وبوسع الجميع المشاركه.

 

هههههههههههه بس يا ريت اصحاب المصانع والمهن دى يقوللنا ايه هى خطوات تصنيع العجل ابو كزايز لحد ما تنزل السوق المصرى وايضا اسعارها بالدولار

 

طيب يامحمد مين ده الله سافر المنصورة ونسيت انت لعب علي ورق اه من حق ايه صحيح الموس دي لعبتها امتي ومن ورايا كمان 

 

شوف ياعم ياسر انا كنت بلعب موس فى الشوارع .وإنت كنت موس فى المذاكره اللهم لا حسد

 

 

 

ياسر شلبي كتب:

طيب ايه هو الموس ده اشرحلنا يا أستاذ محمد

السلام عليكم
الموس يا عم ياسر هو انك تكون حاد في طابعك و بتقطع في جَدَي الناس.
ههههههههههههههه
علي فكرة الموس دي يمكن اللعبة الحيذ هي و البلي اللي عمري مالعبتهم.

 

يا جماعه إنتم إختزلتم اولمبيات برمبال فى الموس بس.فين مهارتكم.

وعلى فكره بوسع الجميع المشاركه

 

موضوع حلو يامحمد كانت ايام جميله بريئه عارف احسن حاجه في الالعاب بتعتنا بتاع زمان انها كانت العاب جماعيه تعالى يامحمداليوم نشوف جيل الانترنت و GAMES

 

لعبه جديده يجماعه انتو نسيتو تقولوها فكرين لعبه الحنجل كنا ديما نلعبها فى حاره سويلم انا حاره الطحنه عرفينها دى كانت عباره عن مربع كبير وفرقين فريق داخل المربع والفريق التانى بره وفى كمان لعبه انتو نسينها لعبه شد المنديل ودى كانت احسن لعبه ويبخت ال يشد المنديل كان بيطحن

 

الله يامحمد ياعبدالله على زمان وموضوعك ذات الطابع الخاص فعلا كانت العاب أولا بتفرع الشحنة والطاقة اللي عند الأطفال والفتيان والشباب وكمان بتقضي على البطالة ، وأعتقد ياجماعة كزايز كانت على أيامنا بالقاف قظايظ)، بالنسبة للعبة السبعة طوبات عبارة عن سبع طوبات من البلاط ترص على بعضها ويكون هناك فريقين وكل لاعب يحاول ايقاعها بكرة صغيرة معينة لهذه اللعبة والفريق الذي نجح في ذلك يمسك بالكرة ويناولها أفراده لبعض والفريق الثاني من خلفهم يحاولون اخذ الكرة عن طريق الرأس فقط لما واحد تاني من نفس الفريق يرص السبع طوبات ...

 

فعلا يا طارق كانت العاب جماعيه وتعمق الروابط بيننا إنت بأه فاكر لعبه الورق

زميلى على الباز ممكن تشرح لنا لعبه الحنجل

استاذى الفاضل على الحسينى باالنسبه للقظايظ لما وصلت لنا كانت مرققه

 

 

 

الحقيقه ايام جميله بجد وبتبان اكتر لما بتحطها فى كفه مقابل PS والعاب الPalm PCs والجيمز اللى موجود بشكل بيفرض نفسه عليك فى كل مكان فيها مافيها من الانيميشن والجرافك وقد ايه Life-like ولكن يبقى عنصر مهم الا وهوه الجماعيه اللى ربتها فينا العاب الشارع وقد ايه بعيده كل البعد عن الMachine-masterعمليه التوحد مع اللعبه سواء كمبيوتر او غيره لدرجه ممكن تصيبك بامراض نفسيه وامراض فى الشخصيه


فياسلام لو ان هذه دعوه لعودة الالعاب هذه لمجتمعنا بعيد عن الحاجات الجديده دى


شكرا ياحماده

 

 

بسم الله

بجد يا ابو عبدالله انت موضوعك مجرد ما الواحد قرأة وعااااااااد بالزاكرة لوراا قوى قوى
حيث لا توجد مسؤلية ولا اى ارتباطات للواحد غير اللعب والجرى والتنطيط من هنا هنا
والشكل مع الحارة التانية ودة اتضرب النهاردة لازم ناخد حقة ..يااااااااااااه بجد ايام كلها براءة
والعاب كلها سلاسة من غير تعقيد ولا ولا .....زى ما قال الكابتن طيار اول اركان حرب قائد معركة المصريين على التتتار فى موقعة تحتموس الرابع عشر الكابتن ( عمرو العدوى ) والله وحشنى يا عمورة واوعى تزعل زى العادة

شكرا لطرحك الموضوع بالصورة دى يا حمااام ..بس انا ناسى لعبة الموس دى !! تصدق